Комисијата за хартии од вредност на САД во обид да ја реши правната битка со „Рипл“ за 50 милиони долари

Комисијата за хартии од вредност на САД (СЕК) презеде мерки за решавање на долготрајната правна битка против „Рипл лабс“ (Ripple Labs Inc.), додека регулаторот продолжува со својата иницијатива за комплетна промена во врска со криптослучаите.

Комисијата за хартии од вредност и компанијата за блокчејн-инфраструктура заеднички ќе побараат од федералниот суд во Менхетн да ја поништи забраната против „Рипл“ и да ослободи повеќе од 125 милиони долари граѓански пари во казна на ескро-сметка (англ. escrow - финансиски договор каде што средствата или парите ги чува неутрална трета страна во име на две други договорни страни, во форма на посредник), според договорот за спогодба поднесен во четвртокот. Од тие пари, 50 милиони долари ќе одат во Комисијата за хартии од вредност, а остатокот ќе биде вратен во „Рипл“, соопшти Комисијата за хартии од вредност.

СЕК посочи дека одлуката да побара крај на случајот „се темели на процената дека таквото решение ќе ги олесни тековните напори на комисијата за реформирање и обновување на нејзиниот регулаторен пристап кон криптоиндустријата, а не на каква било процена на основаноста на тврдењата наведени во тужбата“.

Регулаторот на Волстрит ја тужеше „Рипл лабс“ во декември 2020 година, тврдејќи дека фирмата ги прекршила законите за хартии од вредност со продажба на својот дигитален токен без да го регистрира како хартија од вредност.

Агенцијата бараше казни од речиси две милијарди долари, но судот утврди дека нејзиниот токен XRP е опфатен со законите за хартии од вредност само кога им се продава на институционални инвеститори, пресуда поздравена како победа во криптоиндустријата. Во август судија му наложи на „Рипл“ да плати 125 милиони долари, само дел од тоа што првично го бараше СЕК.

Адвокатката на СЕК, Каролин Креншо, не се согласи со понудата за спогодба, велејќи дека тоа ја поткопува судската наредба.

„Оваа спогодба, заедно со уривањето на програмата за крипто на СЕК, ѝ прави огромна штета на инвестициската јавност и ја поткопува улогата на судот во толкувањето на нашите закони за хартии од вредност“, наведе таа во соопштението.

СЕК отфрли или стави на пауза неколку други правни случаи и истраги насочени кон криптокомпаниите откако претседателот Доналд Трамп ја презеде функцијата и вети дека ќе ја прекине крипторегулацијата. Отфрлените случаи вклучуваат тужби од висок профил против берзите „Коинбејс глобал“ (Coinbase Global Inc.) и „Бајненс“ (Binance Holdings Ltd).

Во март главниот извршен директор на „Рипл“, Бред Гарлингхаус, рече дека фирмата потрошила 150 милиони долари бранејќи се од регулаторот.