Намалената нестабилност ја ослабува првичната привлечност на биткоинот

Со оглед на тоа што поголем дел од годината биткоинот е заглавен во тесен опсег на тргување, една од клучните атракции на најголемата дигитална валута од нејзините најрани денови е опаѓањето.

Внимателно следената мерка за ценовните осцилации, позната како имплицитна нестабилност, се намали на најниско ниво за период од приближно две години, според индексот за нестабилност на биткоинот (BTC) на „Дерибит“ (Deribit). Мерачот ги следи 30-дневните годишни очекувања за нестабилност.

„Биткоинот станува помалку шпекулативен и повеќе сличен на стабилната макроактива“, рече Мајкл Лонгорија, истражувачки аналитичар во криптоинвестициската фирма „Џи-ес-ар“ (GSR).

Трговците се насочија кон оригиналната криптовалута, и тоа не долго по нејзиното деби во 2009 година, како можност за брз начин за заработка преку насочени тргувања. Но, со намалувањето на нестабилноста, многумина гледаат помалку можности за профит. Биткоинот во 2025 година е во пораст за околу 17 проценти, откако во претходните две години неговата вредност најмалку се удвојуваше.

Bloomberg

 

Зголемувањето на имплицитната нестабилност генерално значи дека учесниците на пазарот се помалку сигурни во насоката на цените и трговците обично се подготвени да платат повеќе за да ги заштитат постојните позиции или да шпекулираат за потенцијални движења на цените - нагоре или надолу. Пониско отчитување сугерира дека набљудувачите на пазарот очекуваат стабилни цени.

Во последните два месеца биткоинот се тргуваше во опсег од 93.000 до 111.000 долари, еден од најтесните во последните неколку години. Во минатото не беше ненормално да се видат дневни ценовни осцилации од пет или 10 отсто во само еден ден, кои потоа се поништуваат во следната трговска сесија. Биткоинот во средата порасна за околу 2,4 проценти, на 108.480 долари.

Некои набљудувачи на пазарот ја припишуваат стабилноста на цените делумно на зголемувањето на продажбата на опциите за купување. Сè поголем број сопственици купуваат опции на биткоини што ги поседуваат за да остварат принос. Тактиката помага да се намали нестабилноста со ограничување на движењата на цените на нивоа каде што се активираат опциите, смета Дејвид Ловант, раководител на истражувањето во „Фалкон екс“ (FalconX).

„Постои разлика во профилот на играчите на опции“, рече Ловант. „Ова се еден вид стратегии што во основа имаат ефект на намалување на нестабилноста бидејќи типичниот, да речеме до пред можеби една година, инвеститор во опции беше некој што беше подготвен да купи опции со намера да има раст на цената на биткоинот“.

Стабилноста на биткоинот се совпаѓа со растечкото влијание на институционалните инвеститори, без разлика дали преку корпоративни благајнички вложувања, како што е „Стратеџи“ (Strategy) на Мајкл Сејлор, или американските биткоин ЕТФ-ови. Откако дебитираа во јануари 2024 година, ЕТФ-овите привлекоа околу 54 милијарди долари нето-приливи. „Стратеџи“ држи околу 60 милијарди долари во биткоини. Неодамнешниот извештај на „Гласнод“ (Glassnode), кој покажува пад на обемот на трансакции и зголемување на вредноста на порамнувањето, ја поддржува идејата дека повеќе учесници со висока нето-вредност почнуваат да доминираат на пазарите што започнаа со индивидуални инвеститори.

„Оваа промена помогна да се ублажат екстремите на пазарот и додаде слој на ценовна дисциплина“, рече Лонгорија.