Рекорд на биткоинот – дојде ли време и за помалите криптовалути?

Додека цената на најстарата и најголема криптовалута достигнува нови рекорди, некои очекуваат раст и кај помалите криптовалути.

Цената на биткоинот во последните денови неколкупати достигна рекордни вредности и во понеделникот се движеше околу 122.000 долари по биткоин.

Биковскиот тренд го следеа, повеќе или помалку, и цените на помалите криптовалути, односно таканаречените алтернативни коини (алткоини).

Биткоинот останува во голема предност

Меѓу поголемите алткоини, во изминатата недела најмногу порасна цената на XRP, која се зголеми за околу 30 отсто, со што XRP се искачи на третото место по пазарна капитализација, зад биткоинот и етерот. Етерот за седум дена доби околу 18 отсто вредност.

Сепак, и покрај ваквиот раст, биткоинот останува далеку најголема криптовалута. Таканаречената доминација односно релативното учество на биткоинот во целокупниот пазар на криптовалути останува високо - 63,8 отсто, според податоците на „Коин маркет кап“ (CoinMarketCap).

Доминацијата на биткоинот претставува процентуално учество на неговата пазарна капитализација во однос на вкупната пазарна капитализација на сите криптовалути. Со сегашната цена, пазарната капитализација на биткоинот изнесува околу 2.400 милијарди долари, етерот има 369 милијарди, а XRP 176 милијарди долари. Вкупната пазарна капитализација на сите криптовалути изнесува околу 3.800 милијарди долари.

Капиталот се влева во биткоинот и етерот преку берзанските фондови

„Целокупната пазарна капитализација на дигиталните средства - значи биткоинот и другите криптовалути - сè уште е многу мала во споредба со целиот фиат финансиски систем“, вели Марко Павловиќ, менаџер на портфолио на криптоплатформата „Икономи“ (Iconomi).

Тој исто така укажува на важна разлика помеѓу биткоинот и етерот и другите помали криптовалути: во биткоин и етер може да се инвестира преку традиционалните берзи, благодарение на спот берзанските (ЕТФ) фондови.

Бидејќи тие фондови се тргуваат на најголемите светски берзи, протокот на ликвидност од традиционалниот финансиски систем кон криптопазарот засега главно се одвива преку овие инструменти, објаснува Павловиќ.

Во зависност од приливите во најголемата криптовалута, потоа реагираат и цените на одделни алткоини и други дигитални средства, кои често се меѓусебно поврзани - на пример, средства поврзани со DeFi (децентрализирани финансии), НФТ (незаменливи токени) и слично.

Според Павловиќ, цената на биткоинот (мерена во валути фиат) ќе продолжи да расте поради очекувањата за нова регулатива, особено во САД, каде што актуелната администрација е наклонета кон понатамошен развој на екосистемот на дигитални средства.

Како треба да постапуваат инвеститорите во сегашната ситуација? „Препорачувам постојана едукација и мерење на инвестициите во биткоини“, повторно советува Павловиќ.

Ќе се повтори ли шаблонот на еуфорија на пазарот?

Доминацијата на биткоинот цела година е во тренд на раст, што укажува на зајакнување на довербата во водечката криптовалута, вели аналитичарот Домен Крегар од „Илирика“ (Ilirika). Но тој додава дека во последниот месец се забележува мал пад.

„Во претходните циклуси често се случуваше растот на биткоинот да ја иницира почетната фаза на таканаречен биковски тренд, по што капиталот почнуваше да се прелева во помалите криптовалути. Тогаш пазарот навистина оживуваше“, вели Крегар, потсетувајќи на претходните „мании“ поврзани со ICO, DeFi, NFT и слично.

„Судејќи според историските модели, можно е повторно да влегуваме во слична фаза“, додава тој.

Тој вели дека сега има голем фокус на етерот и неговиот екосистем, особено на стабилните коини. Сè повеќе компании, како што тоа одамна го прави „Мајкростратеџи“  (МicroStrategy, сега Strategy), се одлучуваат да создадат стратегиски резерви во етер.

„Поради тоа, етерот добива нов ветер во грб - и тоа му е многу потребно. Последниве години етерот често беше занемарен и се сметаше за едно од поголемите разочарувања во криптосветот. Но изгледа дека се враќа во игра“, заклучува Крегар.

Премин кон сезона на алткоини? На аналитичката веб-страница „Коин маркет кап“ пресметуваат таканаречен CMC Altcoin Season Index, кој ги споредува цените на најголемите сто алткоини во однос на биткоинот во последните 90 дена. Вредност меѓу 0 и 25 значи дека сме во сезона на биткоини, додека вредност меѓу 75 и 100 укажува на сезона на алткоини. Во последните денови индексот излезе од зоната на биткоин-сезона - според податоците од понеделникот, вредноста изнесувала 32 на скала од 0 до 100. Според аналитичката страница „Сентимент“, индикаторите покажуваат дека започнала сезона на алткоини. Цената на биткоинот над клучното психолошко ниво на поддршка од околу 110.000 долари овозможува инвеститорите да ги реалoцираат своите добивки во алтернативни токени, наведуваат од „Сентимент“.