„Етер машин“ е новата криптофирма на Волстрит вредна 1,5 милијарда долари

Криптофирма на платформа на етереум се согласи да стане јавна преку спојување со компанија за аквизиција со специјална намена (SPAC), поддржано со повеќе од 1,5 милијарда долари во крипто и акции, приклучувајќи му се на бранот од фирми за дигитални средства што се движат кон берзите.

„Етер машин“ (Ether Machine Inc.), компанијата што произлегува по спојувањето, ќе биде поддржана со 169.984 етери од еден од коосновачите и од финансирање со акции од повеќе од 800 милиони долари, според соопштението во понеделникот. До 170 милиони долари во готовина ќе обезбеди доверителниот фонд на „Дајнемикс“ (Dynamix Corp.), компанијата за аквизиција со специјална намена (Special Purpose Acquisition Company – SPAC) што се спојува со „Етер машин“.

Акциите на „Дајнемикс“ пораснаа за 22,6 отсто, на 12,57 долари по акција, до 11:54 часот во Њујорк.

Споената компанија ќе биде предводена од претседателот Ендру Киз и главниот извршен директор Дејвид Мерин, двајцата поранешни вработени во „Консензус“ (Consensys), фирма за блокчејн-софтвер што развиваше апликации за блокчејнот на етереум. „Етер машин“ се очекува да поседува повеќе од 400.000 токени етер, вклучувајќи ги 169.984 вложени од Киз.

Договорот се очекува да се затвори до четвртиот квартал на 2025 година, доколку бидат исполнат условите, вклучувајќи го и одобрувањето од акционерите.

Поднесокот за ова спојување доаѓа среде бранот активности на пазарите на капитал поврзани со крипто, бидејќи регулаторните притисоци попуштија. Берзата за дигитални средства „Булиш“ (Bullish) во петокот поднесе јавна пријава кај Американската комисија за хартии од вредност за иницијална јавна понуда (IPO), а фирмата за менаџирање криптосредства „Грејскејл инвестментс“ (Grayscale Investments) и фирмата за чување крипто „Битгоу“ (BitGo) неодамна поднесоа доверливи пријави за котирање.

Инвеститори, вклучувајќи ги „Раундтејбл партнерс“ (1Roundtable Partners/10T Holdings), „Архитајп“ (Archetype), „Блокчејн.ком“ (Blockchain.com), „Сајберфунд“ (Cyberfund), „Електрик капитал“ (Electric Capital), „Кракен“ (Kraken) и „Пантера капитал“ (Pantera Capital), се согласија да придонесат во купувањето акции.

„Етер машин“ нуди институционална изложеност на етереум и планира да создава вредност преку стратегии за стејкинг (staking – начин на заработка преку чување и инвестирање во одредени криптовалути), ристејкинг и децентрализирани финансиски стратегии, според соопштението.

„Ситигруп“ (Citigroup Inc.) дејствуваше како советник за пазарите на капитал за „Етер машин“ и беше единствен агент за пласирање на институционалното финансирање, се наведува во соопштението. „Коен и Ко.“ (Cohen & Co.) и „Скотија капитал УСА“ (Scotia Capital USA Inc.) го советуваа „Дајнемикс“. Се очекува акциите да се тргуваат на Nasdaq под симболот ETHM.