Етерот падна по надградбата на 'Етериум'

Етерoт падна откако револуционерната надградба на софтверот на мрежата се претвори во она што некои набљудувачи на пазарот го нарекоа „продажба на вести“ - термин што се однесува на појавата на зголемување на цената во период кога се очекуваат добри вести.

Втората по големина криптовалута денеска падна за дури 3,8 отсто на околу 1.475 долари во 12:40 часот во Сингапур, откако падна за повеќе од шест отсто во четвртокот. Етерот зајакна кон средината на јуни, делумно поттикнат од оптимизмот околу надградбата на „Етериум“ (Ethereum), односно т.н. Merge - за да се намали потрошувачката на енергија на мрежата.

„Сега возбудата околу спојувањето е завршена и во моментот нема друг двигател за Ethereum на краток рок“, вели Марта Рејес, шеф на истражување во крипто-берзата BeQuant. „Би било природно да се очекува ротација во биткоинот“, додаде таа.

Биткоинот претходно падна за 1,4 отсто и се тргуваше под 20.000 долари. Се сопнаа и помали токени како аваланч, полигон и солана.

Ремонтот на Ethereum го прави значително енергетски поефикасен и го отвора патот за раст на вредноста и побрз развој, велат програмерите на мрежата. 

„Спојувањето беше дефинитивно успешно“, изјави за Bloomberg TV, Престон Ван Лун, ко-основач на Prysmatic Labs и програмер за Ethereum. „Она што ќе го гледаме понатаму е како се одржуваат метриките. Транзицијата кон proof-of-stake протокол навистина ја отвори вратата за следните фази на надградби“, посочи тој.

Цените на криптовалутите годинава паднаа заедно со другите поризични класи на средства, притиснати од заострувањето на монетарната политика во борбата со високата инфлација. Индексот MVIS CryptoCompare Digital Assets 100 е намален за речиси 60 проценти во 2022 година.

Сепак, спојувањето се смета за потенцијален долгорочен катализатор за етер, бидејќи го подобрува еколошкиот профил на Ethereum.

Во моментов нема коментари за веста. Биди прв да коментира...

Остави коментар