Штип е на чекор да стане првата општина во земјава што ќе издаде обврзница. Постапката оди преку Комисијата за хартии од вредност (КХВ) и Министерството за финансии (МФ). Градоначалникот Иван Јорданов, во гостувањето на Блумберг Адрија ТВ, вели дека планот е со ова задолжување да се финансираат капитални проекти, кои подоцна сами ќе придонесат да се вратат парите од обврзницата.
„Сакавме да направиме исчекор во издавањето обврзница, што кај нас се случува за првпат. Нашиот интерес е преку овие финансии, кои ќе ги собереме преку издавање на обврзниците, да направиме одредени капитални проекти што ќе создадат вредност за нашиот град. Се одлучивме за обврзница, а постапката и сите неопходни документи и проспектот со условите за задолжување се при крај. Очекувам следните денови да се достават до КХВ и веднаш потоа да ја започнеме завршната фаза од издавањето на обврзницата“, вели градоначалникот Јорданов.
Првиот човек на Општина Штип смета дека има доволно интерес за вложување во обврзница издадена од неговиот град, особено затоа што парите ќе се користат за развојни проекти.
„Обврзницата е наменска, се предвидува реализација на една обиколница во градот Штип, како и реализација, односно продолжување на еден булевар, со што практично ќе се овозможи урбанизирање на еден дел од градот. Тоа претставува можност за продажба на парцели за различни намени, со што по основа на ова Општината ќе собере средства што подоцна ќе ја вратат оваа обврзница. Во време на криза мора да размислуваме за враќање на средствата вложени во капитални инвестиции и на тој начин, во кризен период, да се создаде развој“, вели градоначалникот во гостувањето во Блумберг Адрија.
Целиот разговор со Иван Јорданов, градоначалник на Штип, погледнете го во видеото.
.webp){kind=icon}
