.webp){kind=icon}
Европската Централна банка денеска би требало да ги дигне каматните стапки за прв пат по 11 години, и со тоа ќе се придружи на банките кои на овој начин се борат со високата инфлација во светот.
Најавите беа дека каматната стапка ќе порасне за 0,25 процентни поени, но сега прогнозите велат дека ЕЦБ може двојно да ја зголеми каматата, за 0,5 процентни поени.
Без разлика колкаво ќе биде зголемувањето на каматните стапки, во исто време ќе биде претставен и новиот инструмент за купување обврзници за најзагрозените членки.
ЕЦБ чекаше подолго за да ги подигне каматните стапки, тоа веќе го сторија 80 централни банки, меѓу нив и Федералните резерви на САД. ФЕД почна уште во март да ги зголемува каматите и стигна до неодамнешниот најголем раст од 75 базни поени.
Денешната одлука на ЕЦБ доаѓа во најлошото можно време затоа што Европа се соочува со бројни предизвици. Меѓу нив, веројатноста дека континетот ќе се соочи со рецесија заради намалените испораки на гас од Русија, и од друга страна италјанската политичка криза која покажува колку брзо можат да се свртат работите на пазарите со обврзници. Дополнително, еврото неодамна се изедначи со доларот што ја поттикна инфлацијата во ЕУ и таа е сега четири пати повисока од целта на ЕЦБ за стапка на инфлација од два проценти.
Одлуката на ЕЦБ ќе биде објавена денеска во 14:15, а претседателката на Банката, Кристин Лагард, ќе се обрати половина час подоцна, во 14.45 минути.
