Еврото се приближи до највисокото ниво годинава

Еврото се приближи на највисокото ниво во однос на доларот годинава, во услови на очекување дека Федералните резерви (Фед) ќе ги намалат каматните стапки повеќе од Европската централна банка (ЕЦБ) во наредните месеци.

Единствената валута порасна дури за 0,3 отсто, до 1,1029 долари, највисокото ниво од 2 јануари, бидејќи пазарите ги чекаа податоците за инфлацијата во САД за дополнителни докази дека Фед најверојатно ќе започне со олабавување на политиката следниот месец.

Пазарите на пари во моментов ценат дека до декември каматата во САД ќе се намали за над 100 базични поени, во споредба со 70 базични поени во еврозоната. Додека ЕЦБ веќе ги намали стапките за четвртина поен во јуни, трговците гледаат ризик Фед на крајот да биде поагресивен при олеснувањето, што веројатно ќе донесе намалување за половина поен во септември.

Ова е „почеток на подолготрајниот нагорен тренд“ за еврото, рече Франческо Песоле, стратег за ФХ (FX) во „Ај-ен-џи“ (ING). „Целиме на поместување до 1,12 долари во блиска иднина, како резултат на построгиот распон на стапката и стабилизирањето на расположението кон ризик“.

Еврото се зголеми за околу 2 отсто во однос на зелената банкнота од почетокот на август, откако послабиот од очекуваниот извештај за работни места во САД во јули покажа дека трговците ги зголемија облозите за намалување на каматите од страна на Фед. Сега се приближува до годинашното највисоко ниво на 1,1054 долари.

Сепак, не се сите стратези толку убедени дека пазарните цени на циклусите на централната банка ќе се одржат.

Соња Мартен, шефица на одделот за истражување девизна и монетарна политика во „ДЗ банк“ (DZ Bank), гледа мала веројатност дека Фед ќе ја намали каматата за половина поен во септември и вели дека нема фундаментална причина за раст на еврото, бидејќи германската економија е слаба.

„Инвеститорите многу брзо се нафрлуваат на една или две подобри или полоши објави на податоци од очекуваното“, рече таа. „Тоа ги доведе пазарите на погрешен пат во многу ситуации годинава“.