Криптовалутите сепак го завршија кварталот во позитива

Биткоинот сепак забележа мала победа на квартално ниво, иако растот можеби не се чини така голем за овој вид имот, за кој што огромните добивки до неодамна беа нормална работа.

Најголемата криптовалута порасна за 3,7 проценти, на скоро 19.600 долари, а неодамна се тргуваше за околу 19.400 долари. По драстичниот пад, цените на криптовалутите може да се стабилизираат на почетокот од следната година. Наспроти тоа, акциите во моментов се на најниско ниво во 2022 година.

„Се чини дека Вол Стрит верува дека криптото се ближи кон дното и дека ќе претставува атрактивно средство за диверзификација на инвестициите кога државните обврзници ќе го достигнат врвот во приносите“, рече Едвард Моја, виш пазарен аналитичар во Оанда.

Добивката можеби не е голема, но се истакнува во црвенилото што преовладуваше, особено по падот од скоро 60 отсто во вториот квартал. Средствата за тргување ширум светот се погодени од комбинацијата на брзо зголемување на каматните стапки од страна на Федералните резерви (ФЕД), тврдоглаво високата инфлација и засилените геополитички тензии. Единствен голем исклучок е американскиот долар, заедно со индексот „Bloomberg Dollar Spot“, кој што зајакна за околу 6 проценти од крајот на јуни.

Надоградбата на етериумот помина добро и помогна да се отстрани неизвесноста, да се постави долен праг на цените и да се привлече интересот на институционалните трговци, рече Дариус Сит, коосновач на крипто-инвестицискиот фонд „QCP Capital“ со седиште во Сингапур. Етерот порасна за 32 проценти во третиот квартал, што е значајно позитивно поместување по падот од 70 отсто во вториот квартал.

„Надоградбата на етериумот беше силна приказна за третиот квартал од 2022 година, иако видовме пад на цената после реконструкцијата“, вели Сит.

Биткоинот сега се стреми кон поповолен период годинава. Податоците за цените, кои датираат од 2010 година, покажуваат дека четвртиот квартал носи раст во две третини од случаите, со просечен напредок од 33 отсто.

„Додека цените се ниски, крипто-екосистемот всушност напредува. Програмерите се фокусирани на изградба на технологија“, вели Сиси Лу, извршна директорка на „Venn Link Partners“.