Сè потешко ќе се наоѓа квалитетно кафе, залихите паѓаат на најниско ниво во овој век

Набавката на најквалитетните зрна арабика би можела да стане потешка и поскапа за производителите на премиум кафе и за нивните купувачи, откако обилните дождови во Бразил го нарушија квалитетот на родот во клучните производни региони.

Врнежите во најголемиот светски производител на кафе не само што ја одложија бербата, туку и намалија дел од понудата на висококвалитетна арабика, која се користи во премиум мешавините на компании како „Старбакс“ (Starbucks), „Лаваца“ (Luigi Lavazza) и „Или“ (Illycaffè).

Премиум арабиката е позната по својот ароматичен и благ вкус, но за нејзино производство се потребни соодветни услови за одгледување и обработка. Обилните дождови соборија голем број зрели плодови од дрвјата, а дел од нив со денови останаа на натопеното земјиште, изложени на вода и контаминација. Тоа може да предизвика зрната да добијат мирис и вкус на мувла и влага.

„Огромен дел од зрната на крајот станува неквалитетен, што доведува до поголем степен на ферментација на кафето, а тоа значително влијае врз самиот напиток“, изјави Симао де Лима, извршен директор на задругата „Експокасер“ (Expocacer), која претставува повеќе од 800 производители во регионот Серадо Минеиро во југоисточен Бразил.

Проблемите во Бразил се особено важни за пазарот на арабика, бидејќи земјата произведува околу 45 отсто од светската количина на оваа сорта. Производството во претходните сезони беше отежнато, што доведе до рекордни цени минатата година. Иако Бразил оваа сезона се движи кон исклучително голема жетва, проблемите со квалитетот би можеле да ја нарушат понудата на најдобрите зрна.

Во Серадо Минеиро, на околу 600 километри северно од Сао Паоло, земјоделците штотуку почнале со бербата кога јунските дождови собориле зрели плодови од дрвјата. Според процените на Де Лима, тропските дождови во просек собориле околу 20 отсто од овогодишниот род, во споредба со пет до седум отсто вообичаено.

Дополнителните врнежи во јули го натопија и кафето што било оставено да се суши, па некои производители морале повторно да го започнат процесот на сушење. Во делови од бразилскиот појас за производство на кафе, количината на врнежи во јуни и јули достигнала од 250 до 500 отсто од вообичаеното ниво, а во некои области паднал дури осум пати повеќе дожд од просекот.

Последиците веќе се чувствуваат на пазарот. Фјучерсите на арабика поскапеа за околу 35 отсто од јуни, со што беше избришан голем дел од годинешниот пад. Квалитетното бразилско кафе на физичкиот пазар се продава со премија од дури 15 центи по фунта во однос на њујоршките фјучерси, според брокери запознаени со пазарот.

Проблемите со квалитетот значат и дека ќе има помалку кафе што може да ги надополни сертифицираните залихи на Intercontinental Exchange во САД и Европа. Тие залихи се основа за референтните фјучерс-договори и се приближуваат до најниското ниво во овој век.

Bloomberg

Вообичаено, зрната што ги исполнуваат критериумите на берзата сочинуваат меѓу 30 и 35 отсто од производството, вели Де Лима. Но поради невообичаено големиот број плодови што годинава паднале од дрвјата, тој удел би можел да се намали на само 10 до 15 отсто.

Поради огромниот удел на Бразил во светското производство, дури и купувачите кои арабиката вообичаено ја набавуваат од други земји би можеле да се соочат со поголема конкуренција за најквалитетните зрна. Најголемите производители на кафе полесно можат да ги пренесат повисоките трошоци врз потрошувачите, особено кај премиум производите, и да комбинираат кафе со различно потекло и квалитет.

 

Американското Министерство за земјоделство проценува дека во сезоната што почнува во октомври, глобалната понуда на кафе ќе ја надмине потрошувачката за 10 милиони вреќи, што би бил најголем вишок во последните шест години. Главниот придонес за тоа ќе дојде од рекордната жетва во Бразил.

Сепак, доколку процените од Серадо Минеиро се покажат точни, во тој глобален вишок ќе има значително помалку премиум арабика.

„Нема да има иста количина висококвалитетно кафе“, предупредува Де Лима.