Нафтата поскапува, „Голдман“ предупредува на ескалација на војната

Цената на нафтата порасна втор ден по ред, додека трговците ги проценуваат нарушувањата во снабдувањето од Блискиот Исток, при што клучен нафтовод во Саудиска Арабија сè уште е надвор од функција.

Брент поскапе над 107 долари за барел откако во петокот се доближи до нешто под 110 долари, што беше највисока цена од мај. Нафтоводот Исток-Запад, кој претставува алтернативна рута за транспортот што инаку минува низ Ормускиот Теснец, беше затворен минатата недела по нападите, а „Сауди Арамко“ сè уште не соопшти кога би можел повторно да биде пуштен во употреба. Ријад сега се обидува дополнително да ги зголеми испораките преку морскиот пат за да го надомести недостигот.

„Нападите врз нафтената инфраструктура претставуваат значајна ескалација“, наведоа аналитичарите на „Голдман“, меѓу кои и Јулија Жесткова Григсби, во белешка во која се осврнаа и на нападот врз нафтоводот. Во оваа фаза, обемот на засегнатите количини и времетраењето на прекините остануваат крајно неизвесни, додаваат тие.

Нафтоводот, кој ја пренесува нафтата преку територијата на кралството до брегот на Црвеното Море, ќе остане надвор од функција неколку недели, објави „Асошиејтед прес“ во понеделникот, повикувајќи се на двајца регионални претставници. Сепак, американскиот секретар за енергетика Крис Рајт изјави дека очекува нафтоводот „многу наскоро“ повторно да биде пуштен во употреба.

Цената на брент годинава порасна за повеќе од 75 отсто, откако војната меѓу САД и Иран се прошири низ енергетски богатиот Блиски Исток, при што беа нападнати бродови во Ормускиот Теснец, а дел од нафтените полиња престанаа со производство. Продолжените превирања, заедно со последиците од руско-украинската војна, ги засилија инфлациските притисоци, придонесувајќи приносот на 10-годишните американски државни обврзници да надмине 5 отсто и да достигне највисоко ниво од 2007 година.

Bloomberg

На дипломатски план, Техеран соопшти дека нема да има разговори со Вашингтон додека не бидат исполнети неговите услови, според објава на платформата X на Мохсен Резаи, секретар на Врховниот совет за национална безбедност на Иран. Тоа следуваше по изјавите на американскиот претседател Доналд Трамп, кој укажа на можен напредок кон завршување на војната, велејќи дека Исламската Република „сака да постигне договор, брзо и очајно“.

„Суровата нафта е заглавена меѓу физичката реалност, која и натаму укажува на загубено снабдување, и реториката што упатува на можна деескалација“, изјави Ребека Бабин, виш трговец со енергенси во „ЦИНЦ Прајват велт груп“. „На крајот, пазарот ќе им даде поголема тежина на реалните барели нафта и на инфраструктурата отколку на реториката.“

Трамп и Украина изнесоа различни верзии за можниот прекин на нападите врз енергетската инфраструктура. Додека американскиот претседател рече дека Москва и Киев се согласиле да ги запрат таквите напади, кои придонесоа за раст на цените на дизелот, украинскиот претседател Володимир Зеленски изјави дека сè уште не е постигнат конечен договор.

Во меѓувреме, на Блискиот Исток, американските сили ги блокираат иранските пристаништа со цел да го зголемат економскиот притисок врз Техеран. Морнарицата на Корпусот на Исламската револуционерна гарда соопшти дека танкер кој се обидувал да помине низ ограничена зона во јужниот дел на Ормускиот Теснец експлодирал откако удрил во мини. Американската Централна команда соопшти дека тоа тврдење е неточно.

Инвеститорите ги следат и случувањата во Јемен. Хутите, кои имаат поддршка од Иран, во понеделникот истрелале ракети и беспилотни летала кон цивилни цели во саудиските градови Хамис Мушаит, Абха и Таиф, објави на X портпарол на коалицијата предводена од Саудиска Арабија.