ОПЕК+ размислува за намалување од два милиона барели дневно

Групата ОПЕК+ размислува за најголеми намалувања на производството на нафта од 2020 година, во обид да ги стабилизира цените кои паѓаат од средината на летото поради забавувањето на глобалната економија и зголемувањето на каматните стапки. Сепак, овој потег е ризичен бидејќи може да ги зголеми тензиите со Вашингтон.

Претставниците на сојузот во Виена изјавија дека се подготвени да разговараат за намалување на производството на нафта за дури два милиона барели дневно. Сепак, во реалноста овој потег ќе има помало влијание врз глобалната понуда бидејќи неколку земји веќе испраќаат помали количини. Претставниците на групата на земји извознички на нафта и нивните сојузници би можеле да разговараат и за помали намалувања од еден до 1,5 милиони барели.

Големо намалување од страна на ОПЕК+ би можело да предизвика нов шок за светската економија, која веќе се бори со инфлација предизвикана од зголемените трошоци за енергија. Можно е потегот да ги вознемири САД и потенцијално да предизвика одговор од Вашингтон. Претседателот Џо Бајден претходно годинава ја посети Саудиска Арабија, во надеж дека ќе преговара за зголемување на производството за да се намалат цените на горивото на пумпите во САД, пред изборите во ноември.

„Тешко е да се процени колку е загрижена администрацијата на Бајден за потенцијалното ново зголемување на цената на нафтата“, рече Боб Мекнали, основач на Rapidan Energy.

Претставници на Белата куќа веќе побараа од американското Министерство за енергетика да анализира дали забрана за извоз на бензин, дизел и други нафтени деривати би ги намалила цените, објави во вторникот Bloomberg. Тоа е контроверзна идеја, но наидува на поддршка во некои делови од администрацијата на Бајден.

Bloomberg Chartmaker

Додека министрите на ОПЕК+ се состануваат во Виена, европските и американските лидери работат на ограничување на приходите на Москва од нафтата, во обид да ја ослабат воената машинерја на Владимир Путин. ЕУ треба да одобри нов пакет санкции што сериозно ќе ја ограничи способноста на Русија да продава сурова нафта, додека САД соработуваат со сојузниците за да ги спроведат ограничувањата на цената на руската нафта.

Потегот на ОПЕК+ оди во спротивна насока и го нагласува заострувањето во американско-саудиските односи и трајната сила на саудиските врски со Москва и покрај војната. Рускиот вицепремиер Александар Новак се очекува лично да присуствува на состанокот во Виена, што претставува дипломатска главоболка за Европската унија.