Светската потрошувачка на јаглен ќе се искачи на највисоко ниво оваа година и покрај амбициозните глобални цели земјите да се одвикнат од согорувањето на валканото фосилно гориво.
Потрошувачката на јаглен се чини дека ќе се зголеми за 1,2 отсто во 2022 година, за првпат надминувајќи осум милијарди тони во една година, според извештајот на Меѓународната агенција за енергија објавен во петокот. Исто така, се посочува дека потрошувачката веројатно ќе остане на тоа ниво до 2025 година, бидејќи падот кај напредните економии е неутрализиран со побарувачката на азиските пазари во развој, како што се Кина и Индија.
Употребата на фосилни горива во светот ќе достигне највисоко ниво во историјата. Со жолта боја е реалната употреба на јаглен, а со сиво се означени процените на Светската енергетска заедница / Bloomberg Mercury
Големата зависност на Европа од јаглен годинава беше предизвикана од намалувањето на руските испораки на гас, принудувајќи ја да се сврти кон други извори на енергија. Ова дојде во време кога европските лидери се обидуваат да се свртат кон обновливи извори на енергија.
Анализата „ја нагласува итната потреба за масовно зголемување на обновливите извори на енергија и енергетската ефикасност за да се намалат сметките на луѓето, да се обезбеди снабдувањето со енергија и да се задржат непроменети основните климатски цели“, вели Александру Мустаца, активист во „Јуроп бијод коал“ (Europe Beyond Coal). „Важно е дека ниту една европска земја не ги ревидирала своите планови за целосно исфрлање на јагленот до 2030 година, а Европа сè уште е на пат да биде без јаглен до крајот на деценијата“.
.webp){kind=icon}
