Налетот на купување челик во изминатите неколку недели го поттикна оптимизмот на главниот раководител на „Стелко“ (Stelco Holdings Inc) за следните шест месеци. Според главниот извршен директор Алан Кестенбаум, канадскиот производител на челик целосно ги резервирал пратките до крајот на годината и направил значаен упад во првата половина на следната година.
Пресвртот доаѓа по неколкумесечни падови на цената на челикот, бидејќи побарувачката опадна, што им отежнува на производителите да го продаваат металот што е клучен за автомобилската индустрија и градежништвото. Цените на челикот паднаа за повеќе од 50 проценти во текот на оваа година, вклучувајќи и пад од речиси 15 отсто само во последните три месеци, што значајно влијаеше на бизнисот на „Стелко“, компанија со седиште во Хамилтон, Онтарио.
„Тоа што го видовме пред околу три недели беше слабост на цените и побарувачката, дури и самото исполнување на четвртиот квартал беше тешко. Но се случи пресврт кај цените и луѓето не сакаат да го пропуштат дното, па затоа се обидуваат да ги дополнат резервите“, рече Кестенбаум во телефонско интервју.
Движење на цените на челикот / Bloomberg Mercury
Неговите коментари доаѓаат само еден ден откако три од најголемите американски производители на челик испратија мешани сигнали на пазарот, при што „Нукор“ (Nucor Corp) предупреди за потенцијална рецесија, а „УС стил“ (US Steel Corp) истакна дека побарувачката во декември се подобрува поради забрзување на барањата на клиентите.
Кестенбаум, кој не избегнува да коментира за пазарот на челик, смета дека рецесија е малку веројатна, главно затоа што невработеноста останува тврдоглаво ниска. Сепак, побарувачката на челик во втората половина на 2023 година целосно зависи од тоа во која насока ќе оди пошироката економија.
Кестенбаум во август рече дека тоа е дното на пазарот на челик, велејќи дека активноста за нарачки се зголемила по летното затишје. Кога го прашаа оваа недела што згрешил, извршниот директор рече дека не го сфаќа степенот до кој купувачите се подготвени да дозволат нивните резерви да се трошат. Дури сега „Стелко“ и другите компании видоа дека купувачите почнуваат да создаваат резерви.
Што се однесува до специфичните клучни индустрии во кои се продава челикот, Кестенбаум рече дека гледа мала промена во побарувачката од автомобилскиот сектор за следната година, бидејќи повисоките каматни стапки им отежнуваат на многу потрошувачи да си дозволат нови кредити за автомобили. Нестанбената градба, според него, исто така ќе се соочи со проблеми од повисоките каматни стапки, но ако не дојде до рецесија, не гледа дека секторот многу ќе падне. Според процените на извршниот директор, цените на челикот ќе забележат пораст во почетокот на следната година.
„Не мислам дека ќе имаме експлозивна година, не го очекувам тоа во 2023 година. Мислам дека ќе имаме просечна година во однос на последните две“, рече тој.
.webp){kind=icon}
