text size
Германија се уште е со години далеку од замена на рускиот природен гас со капацитети за течен природен гас (ЛНГ), проценува Министерството за економија на земјата.
Според документот подготвен од Министерството, Германија ќе треба до 2026 година да инсталира капацитет за увоз од 56 милијарди кубни метри ЛНГ, што е приближно колку што Германија увезла од Русија во 2021 година. Овие капацитети би можеле да достигнат ниво од 76,5 милијарди кубни метри до 2030 година, што би било околу 80 отсто од вкупната потрошувачка на гас во земјата во 2021 година.
Засега Германија ја намалува зависноста од рускиот гас со намалување на потрошувачката, увоз на ЛНГ преку соседните земји и зголемување на испораките од Норвешка и Холандија. Некои од тие количини се доведени во прашање со оглед на плановите на Холандија да ги затвори гасните полиња во близина на Гронинген поради опасности од земјотрес.
„Вистината е дека во следните три до четири години нема да има доволно капацитет за производство на ЛНГ на глобално ниво за да се задоволи растечката побарувачка. Затоа, необјавената стратегија е дека Германија ќе продолжи да плаќа луди цени додека другите, помалку богати земји ќе останат со празни раце“, изјави за „Блумберг“ Кристијан Леј од германската левица.
Портпаролот на Министерството за економија не сакаше дополнително да коментира за споменатиот документ.
.webp){kind=icon}
