Групата на индустриски најразвиените земји Г-7 и земјите од Европската унија (ЕУ) постигнаа договор за ограничување на цената за продажба на руски дизел на трети земји на 100 долари за барел.
Станува збор за ограничување поврзано со почетокот на ембаргото на ЕУ за увоз на руски нафтени деривати, кое стапува на сила во недела.
Г-7 објави во соопштение доцна во петокот дека е постигнат договор и за ограничување на цената на 45 долари за барел за деривати кои се продаваат со попуст, како што е мазутот.
Договорено е и до март да се одложи преиспитувањето на лимитот за извоз на руска нафта, каде цената беше одредена на 60 долари за барел. Потоа би започнале редовните двомесечни ревизии на поставените граници, велат извори запознаени со ова прашање.
За наметнување на ограничувања потребна е согласност од сите членки на ЕУ и потврда на групата Г-7. По договорот во ЕУ на ниво на амбасадори, останува одлуката уште формално да ја потврди Европскиот совет.
„Ограничувањата што ги воведовме ќе служат за намалување на способноста на Русија да ја води својата незаконска војна“, рече американската министерка за финансии, Џенет Јелен.
Ограничувањето на цената вклучува ослободување за товарите што биле натоварени пред да се постигне договорот до април.
Поентата е да се оневозможи давање транспортни и осигурителни услуги за товари доколку нивната цена не е договорена под наметнатиот праг.
Референтната цена на дизелот во северозападна Европа падна во последните денови и сега изнесува 113 долари за барел. Сепак, рускиот дизел веќе оваа недела имаше попуст од околу 90 долари за барел.
Аналитичарите очекуваат дека рускиот извоз на дизел ќе се намали за околу 200.000 барели дневно по воведувањето на ембаргото од страна на ЕУ.
.webp){kind=icon}