Поскапувањето на пченицата за 10 отсто се заканува да ја разгори инфлацијата

Пченицата се придвижи кон неделна добивка од повеќе од 10 отсто поради стравувањата дека зголемените закани по трговијата со жито во Црно Море ќе го намалат снабдувањето.

Фјучерсите малку пораснаа во петокот, на крајот на нестабилната недела во која Русија го прекина договорот што ѝ дозволуваше на Украина да извезува жито преку одредени пристаништа на Црно Море, а потоа нападна украински земјоделски капацитети. Двете земји предупредија дека бродовите што се упатуваат кон нивните пристаништа може да се сметаат за воени цели.

Ескалацијата на тензиите во Црно Море додава ризици за глобалните пазари за жито. Екстремните временски услови веќе прават хаос кај посевите низ Азија, Јужна Европа и САД. Индија го зголеми шокот во снабдувањето со храна во четвртокот со забраната за извоз на некои видови ориз.

Пченката и сојата неделава ги намалија добивките, но нивниот пад беше ограничен од очекувањата за топло време во американските региони што се клучни во одгледувањето. Посувото време на Среден Запад и делтата следната недела ќе ја намали влагата и ќе го зголеми стресот за пченката и сојата, се наведува во најновиот извештај од „Максар“.

Цени:

Пченицата за испорака во септември во Чикаго порасна за 0,9 отсто, до 7,3325 долари за бушел, што неделава е вкупен раст од околу 11 отсто и најголема неделна добивка од средината на јуни.

Пченката за испорака во декември беше намалена за 0,3 отсто, на 5,4475 долари за бушел, до 10.45 часот пo сингапурско време; фјучерсите сè уште се за шест отсто повисоки оваа недела.

Сојата за испорака во ноември се зголеми за 0,2 отсто, на 14,0725 долари за бушел; цените оваа недела се зголемија за 2,7 отсто.

Во моментов нема коментари за веста. Биди прв да коментира...

Остави коментар