Пченицата на највисоко ниво во последните пет месеци

Вредноста на пченицата продолжи да расте достигнувајќи највисоко ниво во последните пет месеци откако Русија го нападна пристаништето на реката Дунав во Украина, интензивирајќи ги напорите да се уништи виталниот пат за извоз на украинското жито до светските пазари.

Во напад со дрон во понеделникот на дунавското пристаниште Рени беше уништен хангар за жито. Нападот дојде една недела откако Москва стави крај на договорот што ѝ дозволуваше на Украина да ги испорачува своите посеви преку Црното Море, а потоа беа нападнати и пристаништата во Одеса.

„Овој удар на Дунав е огромна работа“, рече Мајкл Магдовиц, висок аналитичар за стоки во групацијата „Рабобанк“. Пченицата најверојатно ќе биде најмногу погодена од какво било затворање на извозниот капацитет, а потоа пченката, рече тој.

Растителните масла сè уште може да се транспортираат со камиони и возови, но помалку е исплатливо житото да се извезува на тој начин, додаде Магдовиц.

Фјучерсите на пченицата се искачија за 2,6 проценти во Чикаго на 7,7725 долари за бушел, што е највисоко од 21 февруари годинава. Фјучерсите скокнаа за лимитот за размена претходниот ден. Пченката за декемвриска испорака поскапе за 0,7 проценти.

Рени е едно од најголемите речни пристаништа во Украина за жито и се наоѓа на Дунав на границата со Романија. Локалните трговци ги прошируваа капацитетите таму како одговор на руската морска блокада. Иако не е јасно колку нападите ќе влијаат на извозот од Рени, тие ги зголемуваат оперативните ризици.