Нафтениот гигант „Сауди Арамко“ (Saudi Aramco) се очекува да ја намали цената на својата водечка нафта за Азија за првпат од јуни, за да му се спротивстави на приливот на поевтини американски и европски барели, што ќе доведе до зголемена конкуренција во најголемиот регион што увезува нафта во светот.
Државниот саудиски производител ќе ја намали официјалната продажна цена за 1,05 долар за барел за јануари во однос на претходниот месец, според просечната процена во истражувањето на „Блумберг“ на шест преработувачи и трговци. Тоа би било најголем пад од февруари.
Физичките пазари во Азија ослабеа во текот на изминатиот месец, при што глобалниот репер брент падна за околу 15 отсто од врвот на крајот на септември, што може да ѝ отежне на Саудиска Арабија да го задржи нивото на цените. Исто така има зголемување на понудата од САД, Гвајана и Северно Море, што покажува дека стратегијата на кралството за ограничување на производството за да ги зголеми цените доведува до ризик од губење на пазарниот удел.
Bloomberg
Нафтата надвор од Блискиот Исток станува сè попривлечна за азиските купувачи бидејќи суровата нафта од Дубаи, репер според кој се цени најголемиот дел од нафтата од Персискиот Залив, расте поради ограничувањата во снабдувањето од ОПЕК и сојузничките производители. Според податоците на ПВМ (PVM Oil Associates), нафтата од Дубаи и брент сега се речиси на паритет, што е невообичаена ситуација со оглед на тоа што глобалниот репер е генерално поскап. ВТИ, американскиот репер, моментално е околу пет долари поевтин од неговиот блискоисточен колега.
Одговорите на истражувањето се движеа од пад од 75 центи до два долара за барел и главно се засноваа на претпоставката дека кралството ќе го продолжи едностраното намалување на производството од еден милион барели дневно во следната година на состанокот на ОПЕК+ в четврток. „Арамко“ обично ги објавува своите официјални цени на суровата нафта во првите пет дена од месецот.
.webp){kind=icon}
