Организацијата ОПЕК+ ги отфрли повеќемесечните дипломатски напори на американскиот претседател, Џо Бајден, со едно од најниските зголемувања на производството на нафта во нејзината историја.
Картелот на земји извознички на нафта и нивните сојузници ќе додаде само 100.000 барели на ден во септември, со што на пазарот ќе му овозможи дополнителни залихи со многу побавно темпо отколку во последните месеци и покрај притисокот од Белата куќа да се помогне во намалувањето на цените.
Алијансата од 23 земји ќе го подели тоа ниво пропорционално меѓу членките, а само Саудијците и Обединетите Арапски Емирати можат да го зајакнат производството, па веројатно ќе биде испорачан само мал дел од износот. За јули и август, групата вети дека на пазарот ќе додаде повеќе од 600.000 барели дневно.
Ваквото зголемување нуди мала утеха за потрошувачите кои страдаат од инфлаторен притисок од високите цени на нафтата. Суровата нафта Брент ги избриша претходните загуби, зголемувајќи се за 1,6 отсто до 102,12 долари за барел до 13:52 часот во Лондон.
„Од перспектива на глобалната рамнотежа, денешното ниско зголемување на квотата, најмалото од 1986 година во апсолутна смисла и најмалото досега во проценти, е само бучава“, рече Боб Мекнали, претседател на консултантот Rapidan Energy Group со седиште во Вашингтон и поранешен претставник на Белата куќа. „Сепак, ако цените на бензинските пумпи продолжат да паѓаат, Белата куќа најверојатно ќе си земе заслуга за тоа“, додава тој.
Министрите го одобриле предлогот на онлајн состанок, се вели во денешното соопштение на веб-страницата на ОПЕК. Немало дискусии за тоа дали ОПЕК+ ќе продолжи да го зголемува производството по септември, порачале делегатите.
Saudi Press Agency
По патувањето на Бајден во Саудиска Арабија, американските власти изјавија дека се оптимисти оти Ријад и Вашингтон се на пат кон помирување. За време на неговата посета, кога срдечно се поздрави со престолонаследникот Мохамад бин Салман, американскиот претседател рече дека очекува дополнителни чекори од кралството во однос на производството на нафта. Доцна во вторникот, САД одобрија продажба на оружје во вредност од 3,05 милијарди долари, вклучително и ракети „патриот“ на тешкашот од Блискиот Исток.
ОПЕК+ покажа одредена добра волја кон потрошувачите во последниве месеци, но сега се чини дека сојузот нема апетит да оди многу подалеку.
Пред разговорите, делегатите приватно укажале дека не сакаат да додаваат залихи кога побарувачката на нафта е ограничена од заканата за рецесија во САД и заклучувањата поради Ковид-19 во Кина. Саудијците минатиот месец го зголемија производството на 10,78 милиони барели дневно, според истражувањето на Bloomberg, што е ниво кое се испумпува само во ретки прилики и остава ограничен резервен капацитет.
.webp){kind=icon}
