text size
Златото достигна рекордно високо ниво откако неговата цена порасна за речиси два отсто во четвртокот, додека доларот продолжи да се лизга пред очекуваното намалување на стапката од страна на Федералните резерви (Фед) следната недела.
Златото во петокот поскапе за 0,5 отсто, до 2.570 долари за унца, што го става на пат за неделен раст од речиси три отсто. Благородниот метал достигна ново највисоко ниво во претходната сесија, откако еврото зајакна во однос на доларот, бидејќи инвеститорите ги намалија облозите дека Европската централна банка, која ги намали каматните стапки во четвртокот, повторно ќе ги намали стапките следниот месец.
Цената на златото порасна за околу една четвртина годинава, благодарение на патот на Фед кон монетарно олеснување. Купувањето од централните банки и силната побарувачка за безбедни инвестиции поради конфликтите на Блискиот Исток и во Украина придонесуваат за ова зголемување. Расте интересот и кај малите инвеститори.
Bloomberg Mercury
Трговците ги следат и двата американски податока објавени во четвртокот што покажаа зголемување на поднесоците за надомест поради невработеност и мало зголемување на индексот на цените на производителите во август.
„Податоците за индексот на цените на производителите му оставаат простор на Фед да размисли за поагресивно намалување на каматните стапки понатаму“, рече Јун Ронг Јип, пазарен стратег во ИГ (IG Asia Pte). „Притисокот кон уште едно рекордно високо ниво го зајакнува трендот за раст на жолтиот метал“. Според него, излезот на златото од неговиот опсег ја остава вредноста од 2.670 долари за унца како „проектирана ценовна цел“.
Инвеститорите што ги затвораат своите облози на златото можеби, исто така, придонесоа за растот на металот.
„Златото во моментов се користи повеќе како заштита во портфолиото“, рече Крис Вестон, шеф на истражување во „Пеперстоун“ (Pepperstone Group Ltd). Тој го посочи слабиот извештај за пазарот на трудот во четвртокот како показател дека менаџерите на фондовите можеби гледаат на златото како место за „паркирање“ пари во случај американската економија да се влоши, што дополнително ќе ги зголеми цените.
Златото поскапе за 0,4 отсто, на 2.567 долари, во 11:39 часот во Сингапур. Индексот на доларот на „Блумберг“ падна за 0,2 отсто. Среброто и платината поскапеа, додека цената на паладиумот благо падна.
.webp){kind=icon}
