Рекордните цени на златото ја намалија побарувачката од најголемиот потрошувач Кина

Побарувачката на злато во Кина, која е најголем светски потрошувач на благородниот метал, во третото тримесечје опадна за повеќе од една петтина бидејќи рекордните цени и слабата економија ја намалија потрошувачката, особено за накитот.

Вкупната побарувачка падна за 22 отсто, на 218 тони, во периодот од јули до септември, покажуваат пресметките на „Блумберг“ врз основа на податоците од Кинескиот совет за злато што се објавени утрово. Потрошувачката на накит падна за 29 отсто, на 130 тони, додека кај златните прачки и монетите има пад од девет отсто, на 69 тони.

Цената на златото годинава се зголеми за околу една третина, достигнувајќи нов врв минатата недела, а главно поради зголемените купувања од страна на централните банки, како и одржливата побарувачка од инвеститорите. Тој нагорен ценовен тренд го направи купувањето накит многу поскапо во време кога многу кинески потрошувачи веќе го чувствуваат оптоварувањето од долготрајното забавување на економијата.