Златото се стабилизира откако предупредувањето од Фед предизвика пад

Златото се стабилизира по падот во претходната сесија, предизвикан од предупредувањето на претседателот на Федералните резерви (Фед), Џером Пауел, за ризиците од инфлација врз американската економија.

Со златото се тргува по цена од околу 3.375 долари за унца, откако во средата падна за 0,6 отсто. Иако Фед не ги промени каматните стапки, а креаторите на политиките сè уште предвидуваат две намалувања до крајот на годината, Пауел изјави дека бордот на централната банка и натаму очекува дека царините ќе се одразат на крајните цени.

Носителите на одлуки во Фед исто така објавија нови економски прогнози – први по најавата на претседателот Доналд Трамп во април за широк опсег на царини – кои укажуваат на послаб економски раст, повисока инфлација и пониско вработување годинава. Значителниот пораст на потрошувачките цени би можел да го ограничи монетарното олеснување, што негативно би влијаело на златото, бидејќи тоа не носи камата.

Златото сè уште добива поддршка од тензиите на Блискиот Исток. Трамп изјави дека Иран ја испуштил шансата да постигне договор за својот нуклеарен капацитет, а некои американски функционери наводно се подготвуваат за можен напад врз Иран во наредните денови. Засилените геополитички тензии и економската неизвесност, во комбинација со силната куповна активност од централните банки и приливот во берзанските фондови, го поттикнаа благородниот метал на раст од речиси 30 отсто годинава.

Спот златото порасна за 0,1 отсто, на 3.373,73 долари за унца, во 12:06 часот по сингапурско време. Индексот Bloomberg Dollar Spot не забележа значајни промени.

Во меѓувреме, платината скокна за повеќе од два отсто, на 1.350,17 долари за унца – највисоко ниво во повеќе од деценија – поддржана од наглото зголемување на побарувачката и постојаниот дефицит на пазарот. Среброто, од друга страна, се тргуваше близу највисокото ниво од 2011 година.

„Златото моментално се движи блиску до рекордните нивоа, што ги прави дополнителните инвестиции чувствителни на промени во макроекономските услови и тоа веројатно е причината зошто гледаме пренасочување на капиталот кон платина и сребро“, изјави Пријанка Сачдева, аналитичарка од компанијата „Филип Нова“ (Phillip Nova Ptd Ltd).

Во моментов нема коментари за веста. Биди прв да коментира...

Остави коментар