text size
Среброто се тргува близу највисокото ниво во последниве 14 години, бидејќи инвеститорите го избираат како алтернатива на златото, кое е на прагот на рекордни цени, што доведе до затегнатост на физичките резерви во Лондон.
Цената на среброто порасна за 1,8 отсто во азиското тргување, по минатонеделниот пораст од 4 отсто што го донесе на највисокото ниво од 2011 година. Имплицираниот трошок за позајмување на овој благороден метал за еден месец порасна на повеќе од 6 отсто во споредба со обичната стапка, која е близу нула.
Физичкиот пазар е под притисок, бидејќи резервите значително опаднаа во Лондон, каде што најголемиот дел од металот се чува од берзански фондови (ЕТФ) - што значи дека не е достапен за позајмување или купување. Од февруари обемот на ЕТФ-ови поврзани со сребро се зголемил за околу 2.550 тони, според пресметките на „Блумберг“.
Односот помеѓу двата благородни метала опаднал во последните месеци, но среброто сè уште е релативно евтино во споредба со историските нивоа. За моментално купување 1 унца злато се потребни околу 86 унци сребро, во споредба со 10-годишниот просек од 80.
„Потребата за сребро моментално се зголемува поради заканите од трговска војна и затоа што златото е премногу скапо за многу потенцијални купувачи“, изјави Пријанка Сачдева, аналитичарка од „Филип Нова“ (Phillip Nova Pte Ltd). „Златото веќе доживеа голем пораст и моментално е скапо“, што значи дека многу инвеститори ќе бидат понаклонети кон купување сребро, додаде таа.
Меѓутоа, разликата помеѓу цената на среброто на спот пазарот во Лондон и фјучерсите за септември на Њујоршката берза останува необично широка, слично како на почетокот на годината, кога стравувањата од царини предизвикаа нагло зголемување на испораките на злато и сребро од Лондон во САД, што ги зголеми цените.
Овој метал порасна за 35 отсто годинава, надминувајќи го порастот на златото од 28 отсто. Тој има двојна функција како сигурносна инвестиција, но и индустриски материјал што се користи за соларни панели. Пазарот е на пат да доживее петта година со дефицит, според индустриската група СИ (Silver Institute).
Меѓутоа, златото изгуби дел од своите добивки во азиските часови и се тргуваше на ниво од околу 3.370 долари за унца, по порастот од 0,6 отсто минатата недела. Годинава цената на златото беше поддржана од купување сигурни активи поради зголемените геополитички конфликти и трговски тензии, како и од купувањето од страна на централните банки.
Спот златото беше повисоко за 0,3 отсто, на 3.367,13 долари за унца, во 8:08 часот наутро во Лондон. Bloomberg Dollar Spot Index порасна за 0,2 отсто. Среброто доби 1,3 отсто, со 38,916 долари за унца. Платината и паладиумот исто така пораснаа.
.webp){kind=icon}
