Златото одново се движи кон неделен раст

Златото се движи кон неделен раст бидејќи трговците се фокусирани на податоците за работни места во САД, што треба да се објават денеска, а кои треба да дадат индиции за следниот потег на Федералните резерви (Фед) во однос на каматните стапки.

Цената на златото е близу 4.475 долари за унца, што на неделно ниво е зголемување од околу три отсто. Благородниот метал претходно се соочи со одреден притисок надолу од посилниот долар и почетните барања за надомест за невработеност за неделата што заврши на 3 јануари, кои инаку беа пониски од очекуваното. Податоците за плати во декември, кои не го опфаќаат земјоделството, би можеле да го постават тонот за тоа дали Фед повторно ќе ги намали каматните стапки по трите последователни намалувања во 2025 година.

Bloomberg Mercury

 

Опкружување со пониски каматни стапки претставува опасен ветер за скапоцените метали, кои не исплаќаат камата, а минатогодишните намалувања беа клучна причина за најдобриот годишен резултат на златото од 1979 година. Купувањето од страна на централните банки и приливот во фондовите што се тргуваат на берза, како резултат на таканаречената трговија со девалвација, исто така го поткрепија ланскиот голем раст на златото, кога металот ја зголеми својата вредност за 65 проценти и постави низа ценовни рекорди.

Минатата недела привлечноста на златото беше засилена од геополитичките тензии околу трговските односи меѓу Кина и Јапонија и заробувањето на лидерот на Венецуела од страна на САД. Соборувањето на Николас Мадуро е во прилог на повисоките цени на златото „со оглед на краткорочната и долгорочната неизвесност што ја носи за пазарите на стоки и за односите на Вашингтон со Пекинг и Москва“, велат аналитичарите на „Фич солушнс“ (Fitch Solutions).

 

Изгледите за податоците за работни места не се баш јасни. Се очекува бројките да покажат посилно вработување, но стабилна невработеност - спротивставени сигнали кои веројатно нема да создадат итност за Фед да продолжи со намалувањето на каматните стапки, според „Блумберг економикс“ (Bloomberg Economics). Во меѓувреме, индексот за вредноста на доларот на „Блумберг“ - показател за силата на американската валута – оваа недела доби 0,5 проценти, што го прави златото поскапо за повеќето купувачи.

Трговците внимателно го следат и претстојниот избор на нов претседател на Фед. Министерот за финансии Скот Бесент изјави дека очекува претседателот Доналд Трамп овој месец да донесе одлука за наследник на Џером Пауел, чиј мандат како шеф на централната банка ќе заврши во мај. Во конкуренција се четири кандидати, рече Бесент.

Во рамки на актуелното тргување, цената на златото се намали за 0,1 отсто и сега унца чини 4.473,88 американски долари, додека среброто порасна за 0,1 отсто, на 77,10 долари и останува на пат да оствари неделен раст и покрај падот во претходните две сесии. Поскапеа и платината и паладиумот.