„Извлечи ме“: Трговците продаваат софтверски акции, стравот од ВИ ескалира

Волстрит веќе подолго време е скептичен кон акциите на софтверските компании, но расположението неодамна премина од мечкино во апокалиптично, бидејќи трговците масовно ги продаваат акциите од целиот сектор поради страв дека вештачката интелигенција ќе предизвика големи нарушувања.

„Ние го нарекуваме ‘SaaSpocalypse’, апокалипса за акциите на компаниите за софтвер,“ рече Џефри Фавуца од трговскиот оддел за акции во „Џефрис“. „Тргувањето е во стил ‘само извади ме’  односно масовна распродажба.“

Вознемиреноста се засили во вторникот, откако стартапот за вештачка интелигенција „Антропик“ (Anthropic) објави алатка за продуктивност за правници, што предизвика пад на акциите на фирми за правен софтвер и издаваштво. Притисокот за продажба беше видлив низ целиот сектор: Лондон сток ексчејнџ (London Stock Exchange Group Plc) падна до 10 отсто, „Томсон Ројтерс“ (Thomson Reuters Corp.) се урна до 17 отсто во раното тргување, „Си-ес диско“ (CS Disco Inc.) падна до 14 отсто, а „Легалзум“ (Legalzoom.com Inc.) се намали за 16 отсто.

Ризиците за софтверската индустрија се натрупуваат со месеци, а јануарското лансирање на алатката „Клауд коворк“ (Claude Cowork) од „Антропик“ ги засили стравовите од нарушувања. Акциите на видео-игри исто така беа погодени минатата недела, откако „Алфабет“ (Alphabet Inc.) започна со проектот „Џини“ (Genie), кој може да создава светови што потполно те вовлекуваат со текст или слики. Севкупно, индексот S&P North American Software е во тринеделна серија на пад, што доведе до пад од 15 отсто во јануари  - најголем месечен пад од октомври 2008 година.

„Ги прашувам клиентите: ‘Кое е нивото на кое ќе држите нос над водата и ќе купите?’ – и дури и со целата капитулација, не сум слушнал уверена позиција,“ рече Фавуца. „Луѓето едноставно продаваат сè и не се грижат за цената.“

Bloomberg

Загриженоста се шири и во приватниот капитал: фирми како „Аркмонт асет менаџмент“ (Arcmont Asset Management) и „Хајфин капитал менаџмент“ (Hayfin Capital Management) ангажираат консултанти за да ги проверат своите портфолија за бизниси кои би можеле да бидат ранливи. „Аполо“ (Apollo) ја намали изложеноста на софтвер во своите фондови за директно кредитирање речиси за половина во 2025 година, од околу 20 отсто на почетокот на годината.

Кај американските јавни компании, досега во оваа сезона на извештаи само 67 отсто од софтверските компании во S&P 500 ги надминаа очекувањата за приходи, според податоци на „Блумберг“. Тоа се споредува со 83 отсто за целиот технолошки сектор. Иако сите софтверски компании ги надминаа очекувањата за добивка, тоа малку значеше пред загриженоста за долгорочните изгледи.

На пример, „Мајкрософт“ (Microsoft Corp.) минатата недела објави солидни резултати, но фокусот на инвеститорите на забавениот раст на облачните услуги предизвика нова загриженост за трошоците за ВИ, што ја урна акцијата за 10 отсто во четвртокот. Јануари беше најлош месец за акциите на „Мајкрософт“ во повеќе од една деценија. Во меѓувреме, извештаите од „Сервис нао“ (ServiceNow Inc.) и САП (SAP SE) им дадоа на инвеститорите дополнителни причини за претпазливост околу изгледите за раст на софтверските компании.

Акциите на „Мајкрософт“ паднаа за 1,4 отсто во вторникот, на пат кон четврта последователна негативна сесија.

Од другата страна, „Палантир“ (Palantir Technologies Inc.) даде оптимистичка прогноза за приходите кога ги објави резултатите во понеделникот по затворањето на берзата. Компанијата пријави раст на приходите во четвртиот квартал од 70 отсто, што ги надмина очекувањата на Волстрит. Акциите пораснаа за 8,5 отсто во вторникот.

„Стравот со вештачката интелигенција е дека има повеќе конкуренција, поголем притисок врз цените и дека нивните конкурентни предности се намалени, што значи дека полесно може да бидат заменети со ВИ,“ рече Томас Шип, раководител на истражување на акции во „Ел-пи-ел фајненшл“ (LPL Financial), која управува со 2,4 билиони долари во брокерски и советодавни средства. „Дијапазонот на можни резултати за нивниот раст се прошири, што значи дека е потешко да се одредат фер вреднувања или да се види што изгледа евтино.“

Тие стравови поврзани со ВИ доведоа „Пајпер сандлер“ (Piper Sandler) да ги намали препораките за софтверските компании „Адоб“ (Adobe Inc), „Фрешворкс“ (Freshworks Inc.) и „Вертекс“ (Vertex Inc.) во понеделникот. „Нашата загриженост е дека наративите за seat-compression и vibe coding би можеле да постават горна граница на мултипликаторите,“ напиша аналитичарот Били Фицсимонс. Vibe coding се однесува на користење ВИ за пишување софтверски код.

Сепак, некои инвестициски професионалци ја гледаат распродажбата на софтверските акции како можност. Фондот „Сајкомор“ (Sycomore Sustainable Tech), европски отворен фонд кој ги надмина 99 отсто од своите конкуренти во последните три години, купи акции на „Мајкрософт“ за време на падот, очекувајќи дека компанијата на крајот ќе се појави како победник во ВИ.

Дополнително, акциите на софтверскиот гигант моментално изгледаат евтино, тргувајќи се по 23 пати од проценетата добивка - најниско ниво во околу три години. Од техничка перспектива, неговиот 14-дневен индекс на релативна сила е на нивоа на препродаденост. Пошироко гледано, мултипликаторот на софтверскиот индекс е најнизок во години, а RSI покажува дека е препродаден.

 

Bloomberg

„Софтверскиот сектор веројатно е доволно препродаден за отскок,“ напиша Џонатан Крински, главен пазарен техничар во BTIG, во белешка до клиенти минатата недела. Сепак, тој додаде: „Ќе биде потребно долго време да се поправи и изгради нова база,“ и „ние не сме обожаватели на софтвер веќе некое време, со оглед на влошената релативна сила што навистина се забрза“ во четвртиот квартал минатата година.

Главното прашање за инвеститорите кои сакаат да купуваат софтверски акции е да ги одвојат победниците во ВИ од губитниците. Јасно е дека некои од овие компании ќе напредуваат, што значи дека нивните акции ефективно се на распродажба по последниот пад. Но можеби е прерано да се утврди кои се тие.

„Драконскиот поглед е дека софтверот ќе биде следниот печатен медиум или стоковна куќа, во однос на нивните изгледи,“ рече Фавуца. „Фактот што нишалото толку многу се сврте кон страната ‘продај сè’ сугерира дека ќе има супер-атрактивни можности што ќе произлезат од ова. Сепак, сите чекаме забрзување, а кога ги гледам бројките за 2026 или 2027 година, тешко е да се види потенцијалот. Ако „Мајкрософт“ се мачи, замислете колку лошо може да биде за компании кои се повеќе изложени на нарушувања или немаат доминантна позиција.“

Топ технолошки вести

„Палантир“ (Palantir Technologies Inc.) прогнозира приходи за фискалната 2026 година што значително ги надминуваат очекувањата на Волстрит – поттик за компанијата за анализа на податоци, чијашто акција досега имаше слаб старт оваа година.

Илон Маск ги спојува „Спејс икс“ и „Екс еј-ај“ (xAI) во договор што ја вреднува новата компанија на 1,25 билиони долари, во обид да ги финансира неговите сè поскапи амбиции во вештачка интелигенција и истражување на вселената.

Веќе неколку недели, долгот на „Оракл“ (Oracle Corp.) се тргува како „ѓубре“ поради загриженост дека инвестициите во вештачка интелигенција нема да се исплатат со години – ако воопшто се исплатат. Во понеделникот, тие стравови се намалија откако софтверскиот гигант привлече рекордна побарувачка за продажба на обврзници вредна 25 милијарди долари.

„Убер“ (Uber Technologies Inc.) ја проширува услугата за превоз во Макао, прво навлегување во нов азиски пазар по неколку години.

„Нинтендо“ (Nintendo Co.) забележа раст на профитот од 23 отсто, помал од очекуваниот, откако САД воведоа тарифи на конзолата Switch 2, што силно ги погоди маржите, додека растечките цени на мемориските чипови во 2026 предизвикуваат дополнителни грижи.