На Ворш му е отворен патот до врвот на Фед — доби поддршка по затворањето на истрагата против Пауел

Номинацијата на Кевин Ворш за прв човек на Федерални резерви (Фед) се движи кон брзо решение, откако сенаторот Том Тилис се откажа од својата блокада поради одлуката на Министерството за правда да ја прекине кривичната истрага против актуелниот претседател на Фед Џером Пауел.

Тилис рече дека добил уверување дека случајот против Пауел и Фед е „целосно затворен“, додека главниот инспектор на Фед продолжува со одвоена истрага за пречекорување на трошоците за обновата на зградата на централната банка.

„Со овие уверувања, со нетрпение очекувам да ја поддржам потврдата на Ворш. Тој е исклучителен кандидат и време е Фед да се оддалечи од ова одвлекување на вниманието и повторно целосно да се фокусира на својата мисија“, рече Тилис.

Ворш, кој минатата недела сведочеше пред Сенатскиот одбор за банкарство, ужива широка поддршка кај републиканците. Одборот закажа гласање за неговата номинација за 29 април, а Тилис рече дека е „подготвен да продолжи со процесот на потврда“ и верува дека Ворш ќе биде „одличен претседател на Фед“.

Том Тилис/Bloomberg

Тилис, клучен глас во одборот, претходно се закануваше дека ќе го блокира тој потег додека Пауел е под истрага на сојузните обвинители, сметајќи го тоа за закана за независноста на централната банка.

„Тоа беше мојот проблем од самиот почеток, бидејќи сметав дека некои обвинители во Вашингтон го користат ова како алатка за да го натераат Пауел предвреме да си замине“, рече тој.

Истрагата на главниот инспектор ја води Мајкл Хоровиц, за кого Тилис вели дека е „меѓу најугледните во Вашингтон“, и верува дека ќе заклучи дека во проектот за обнова немало никакви неправилности.

Американската државна обвинителка за округот Колумбија, Џанин Пиро, издаде судски покани во јануари како дел од кривичната истрага за пречекорувањето на трошоците и сведочењето на Пауел пред Конгресот. Во петокот објави дека се откажува од истрагата додека надзорот на главниот инспектор продолжува, напоменувајќи дека би можела повторно да ја отвори ако се појават нови докази.

Мандатот на Пауел на чело на Фед истекува на 15 мај, но неговиот мандат во Управниот одбор трае до 2028 година, што значи дека одлуката на Министерството за правда не го гарантира неговото заминување од институцијата.

Претседателот Доналд Трамп кусо ја коментираше ситуацијата, велејќи дека очекува „мазно“ продолжување на процесот на номинацијата на Ворш, но не даде јасен сигнал за иднината на Пауел, велејќи дека сака дополнително да ги разјасни околностите за пречекорувањето на трошоците.

Иако потврдата на Ворш сега изгледа поизвесна, континуираниот политички притисок сугерира дека Пауел би можел да остане во Фед и по завршувањето на неговиот претседателски мандат, особено додека е во тек внатрешна истрага.

Ворш (56) беше гувернер на Фед од 2006 до 2011 година и оттогаш е чест критичар на работата на институцијата. На сослушувањето повика на „промена на режимот“ во начинот на спроведување на монетарната политика.