САД бараат поддршка од Кина и сојузниците за Ормуз

Американскиот секретар за финансии Скот Бесент ги повика сојузниците на САД и Кина да се приклучат на американската операција за придружба на бродови низ Ормускиот Теснец, иако тврдеше дека нацијата има целосна контрола врз овој витален воден пат за глобалната трговија со нафта.

„Да видиме дали Кина - да видиме дали ќе се вклучи со дипломатија и ќе ги натера Иранците да го отворат теснецот,“ рече Бесент во понеделник на „Фокс њуз“. „Иран е најголем државен спонзор на тероризмот, а Кина купува 90 отсто од нивната енергија, така што тие го финансираат најголемиот државен спонзор на тероризмот.“

Министерот зборуваше нешто повеќе од една недела пред претседателот Доналд Трамп да се сретне со својот кинески колега Шји Џјинпинг на високо профилирана посета на Кина.

„Заканата од напади од Иран го затвори теснецот - ние го отвораме,“ рече Бесент. „Затоа би ги повикал Кинезите да ни се придружат во поддршката на оваа меѓународна операција.“

Трамп рече дека САД ќе започнат со напорите во понеделник а операцијата е наречена „Операција Слобода“, притоа  војската ќе обезбеди поддршка за да им помогне на бродовите заглавени во Персискиот Залив да го преминат теснецот. Напорот треба да вклучи употреба на разурнувачи со наведувани ракети, авиони и дронови.

Бесент рече дека тековниот глобален недостиг на нафта поради конфликтот изнесува околу 8 до 10 милиони барели дневно. Секој танкер што минува низ Ормуз носи околу 2 милиони барели, додаде тој. Ако четири или пет бродови излезат секој ден, тоа би го покрило дефицитот, рече тој. Постојат 150 до 200 такви бродови што „можат да излезат,“ додаде.

„Затоа мислам дека пазарот ќе биде многу добро снабден,“ рече Бесент.

Во меѓувреме, економијата на Иран „е во слободен пад,“ рече министерот за финансии. „Сите велат дека имаат висока толеранција на болка. Но нивните војници нема да имаат висока толеранција за тоа ако не се платени.“