Невидени пожари во Шпанија и Франција, евакуирани се повеќе од 200.000 луѓе

Во текот на ноќта повеќе од 200.000 луѓе беа евакуирани од градови во централна Шпанија и јужна Франција, откако неконтролираните шумски пожари опасно се приближија до Мадрид и Бордо. Властите наредија итна евакуација на делови од западните предградија на Бордо поради променливиот правец на ширење на пожарот, вклучително и подрачјето каде што се наоѓа градскиот аеродром.

Повеќе од 140.000 луѓе беа евакуирани од француските департмани Жиронда, на кој му припаѓа Бордо, и Ланд во југозападниот дел на земјата, каде што пожарите се oд „невидени размери“, изјави доцна во петокот премиерот Себастиен Лекорну во објава на мрежата X.

Повеќе од 500 припадници на армијата се распоредени како поддршка на пожарникарите, а уште толку ќе бидат дополнително ангажирани во сабота, изјави Лекорну. Тој додаде дека „безбедносните сили се во целосна подготвеност за да помогнат во евакуацијата на населението, да ги обезбедат погодените подрачја и да го заштитат имотот од грабежи“.

Во регионот на Мадрид и провинцијата Авила околу 63.000 луѓе се евакуирани или добиле наредба да не ги напуштаат своите домови, соопшти шпанското Министерство за внатрешни работи доцна во петокот. Засега нема пријавени жртви.

Пожарите што го зафатија југозападниот дел од регионот на Мадрид, при што изгореа повеќе од 9.000 хектари, и понатаму се активни и надвор од контрола, соопштија официјални лица во саботата. Откако во петокот попладне го достигнаа најголемиот интензитет, три одделни огнени стихии се споија во еден голем пожар кој и понатаму се шири. Регионалните власти оценуваат дека ситуацијата е „надвор од контрола“.

Системот за следење на квалитетот на воздухот во Мадрид забележа нагло влошување на условите во западниот дел од градот во саботата наутро, додека мирисот на чад се чувствуваше дури и во близина на Кралската палата во центарот на главниот град. Пониските температури, послабиот ветер и поголемата влажност на воздухот во текот на ноќта би можеле да им дадат шанса на пожарникарите да ги стават пожарите под контрола, изјави во петокот еден претставник на шпанската влада.

Францускиот претседател Емануел Макрон во петокот вечерта нареди мобилизација на армијата, откако пожарите се приближија до градското подрачје на Бордо, каде што живеат повеќе од еден милион луѓе. Блиските градови превентивно се евакуираат. Сообраќајниот сервис БФ (Bison Futé) ги повика возачите да ги избегнуваат патиштата во Жиронда за службите за итна помош да можат непречено да се движат. Жиронда се соочува со конвективен пожар, кој создава сопствени ветрови, го забрзува ширењето и може нагло да го промени правецот, рече Лекорну, истакнувајќи дека пожарникарите досега не се соочиле со таков феномен.

Шпанија и Франција се наоѓаат во епицентарот на овогодишната европска сезона на шумски пожари, која започна порано од вообичаено и дополнително се интензивираше во последните недели поради последователните топлотни бранови што ја исушија вегетацијата и овозможија брзо ширење на огнот. Пожарите низ континентот зафатија повеќе од 329.000 хектари, уништија земјоделски посеви и го нарушија сообраќајот.

Француски крајбрежен град евакуиран поради ширењето на пожарите Bloomberg

Во Шпанија, огнот досега го зафати комплексот на американската вселенска агенција НАСА во местото Робледо де Чавела, еден од трите центри на мрежата NASA Deep Space Network во светот, како и манастир од 12 век во Пелајос де ла Преса, во близина на местото каде што избувна еден од пожарите. Пожарот сега се движи кон градовите Ел Ескоријал и Сан Лоренцо де Ел Ескоријал, каде што живеат околу 36.000 луѓе, како и кон палатата Ел Ескоријал од 16. век, најголемата ренесансна градба во светот.

Властите истовремено се борат и со уште еден пожар во соседната провинција Авила, стравувајќи дека би можел да се спои со пожарот што беснее во регионот на Мадрид.

Евакуираните жители главно се сместени во градски спортски центри, пред сè за да се заштитат од густиот чад, кој се шири побрзо од самиот пламен.

Француските власти во петокот наредија евакуација на околу 110.000 жители и туристи откако пожарите се заканија дека ќе стигнат до Кап Фере, популарна туристичка дестинација западно од Бордо, изјави министерот за внатрешни работи Лоран Нунез за телевизијата ТФ1.

Според објавите на локалните власти, пожарите во департманот Жиронда зафатиле околу 30.000 хектари и „проголтале“ повеќе куќи. Во департманот Ланд, појужно, изгореле уште 2.600 хектари, поради што биле евакуирани повеќе од 23.000 луѓе.

Шумските пожари пустошат низ Европа

На јужна Европа отпаѓа најголемиот дел од 329.000 хектари што изгореа во 2026 година Bloomberg

Со прогласувањето вонредна состојба на национално ниво за Мадрид и Авила, шпанската влада го презеде управувањето со кризата, при што Министерството за внатрешни работи ги координира активностите, а Воената единица за вонредни ситуации ги води операциите на терен.

Според податоците на Европскиот информативен систем за шумски пожари (EFFIS), изминатата недела била најтешка во 2026 година кога станува збор за шумските пожари во Шпанија. Од почетокот на годината во земјата изгореле околу 140.000 хектари, што е повеќе од трипати над просекот за претходните две децении.

Климатските промени ги засилуваат периодите на екстремни горештини во Европа, континентот кој се затоплува најбрзо во светот. Рекордните температури и сушата доведоа до најлошиот почеток на глобалната сезона на шумски пожари откако се води евиденција, додека климатските научници предупредуваат дека развојот на феноменот Ел Нињо би можел да донесе уште потешки услови во текот на остатокот од летото.