Франција стравува дека ветровите ќе ги разгорат шумските пожари

Франција стравува дека променливите ветрови и растечките температури би можеле дополнително да ги разгорат огромните шумски пожари на југозападот од земјата, иако Шпанија доби извесно олеснување во борбата со пожарите во близина на Мадрид.

Во вторникот, регионалните власти наредија евакуација на околу 4.000 лица од кампови и други туристички сместувања во градот Лакано. Големината на пожарот и ветровите, за кои се очекува повеќепати да го менуваат правецот, биле меѓу главните причини за оваа одлука, изјави градоначалникот на Лакано, Лоран Пејронде.

„Сè уште се соочуваме со многу, многу сурови временски услови“, им изјави Пејронде на новинарите, објаснувајќи ја најновата евакуација.

Четвртиот топлотен бран што ја зафати Западна Европа од крајот на мај ќе донесе температури до 41°C во југозападна Франција во среда. Според „Метео-Франс“, брзината на ветерот во Бордо ќе достигне 20 километри на час, со двојно посилни налети.

Тоа создава ризик дополнително да се засилат пожарите што ги опустошија селата и шумите западно и јужно од Бордо, принудувајќи на евакуација повеќе од 200.000 жители и туристи.

„Ситуацијата останува комплицирана, очигледно, сè уште не сме надвор од опасност“, им рече на новинарите во вторникот вечерта префектката на регионот, Софи Брокас. И таа го посочи ветерот како дополнителен отежнувачки фактор.

Пожарот во францускиот департман Жиронд бил проследен со појава на пирокумулонимбус, исклучително моќна бура создадена од самиот пожар, според Франческа Ди Џузепе, координаторка за прогнози на пожари во Европскиот центар за среднорочни временски прогнози. Ваквите појави се добро документирани во Австралија, Канада и САД, каде што се поврзуваат со најекстремните шумски пожари, но сè уште се релативно ретки во Европа, посочи таа.

Шпанија и Франција се во епицентарот на европската сезона на шумски пожари, која годинава започна порано и значително се интензивираше во последните недели, бидејќи последователните топлотни бранови ја исушија вегетацијата и овозможија пожарите побрзо да се шират.

„Влеговме во ера на пожари што не можат да се изгаснат“, изјави Виктор Реско де Диос, професор по шумарско инженерство и глобални промени на Универзитетот во Љеида. „Станува збор за пожари што горат со интензитет споредлив со неколку атомски бомби, па затоа нивното гаснење е исклучително сложено.“

Температурите во делови од Шпанија во среда исто така ќе достигнат 40°C, што дополнително ќе ги оптовари службите за итни интервенции, но има знаци на напредок во ставањето под контрола на пожарите околу Мадрид.

Откако во текот на ноќта било запрено напредувањето на активните огнени фронтови, во вторникот попладне беа укинати наредбите за евакуација и останување во домовите во неколку општини во Мадрид и во провинцијата Авила. Тоа им овозможи на околу 20.000 жители да се вратат дома, а уште 14.000 луѓе да излезат од мерките за изолација.

Сепак, според метеоролошката агенција „Аемет“, поголемиот дел од Шпанија и понатаму е под многу висок ризик од шумски пожари. Досега пожарите уништиле повеќе од 170.000 хектари во земјата, што е шест пати повеќе во споредба со истиот период минатата година.