Рекордно топлите мориња се закануваат со силни бури во Европа

Растечките температури во океаните имаат потенцијал да предизвикаат силни бури во Европа подоцна оваа година, покажува ново истражување.

Средоземното Море се загрева двојно побрзо од просекот за океаните во остатокот од светот, покажуваат податоците на „Ворлд ведер“ (World Weather Attribution), група научници кои користат рецензирани методи за брзи истражувања за тоа како климатските промени влијаат врз временските обрасци. Во делови од Средоземното Море и долж европскиот брег на Атлантикот во јуни биле забележани површински температури за повеќе од шест Целзиусови степени повисоки од оние што би се сметале за нормални.

„Кога имаме многу високи температури на површината на морето, тоа им обезбедува дополнителна енергија на бурите, па тие можат да траат многу подолго“, рече Кетрин Грегори, истражувачка на Универзитетот во Берн во Швајцарија и коавторка на извештајот.

„Ова е релативно нова област на истражување, но веројатно е едно од најважните влијанија кога зборуваме за тоа како морските топлотни бранови влијаат врз луѓето“, рече таа.

Глобалното затоплување предизвикано од човекот било главниот двигател на рекордно високите температури на морето забележани околу Пиринејскиот Полуостров и во западниот и источниот дел на Средоземното Море во јули, утврдиле истражувачите. Европа, континентот што се загрева најбрзо во светот, се бори да се приспособи на немилосрдните топлотни бранови, кои ова лето веќе резултирале со проценети 25.000 смртни случаи. Истовремено, растечките температури ја погодуваат економијата, при што снабдувањето со суровини, критичната инфраструктура и енергетската безбедност се изложени на ризик.

„Топлотната купола што се задржува над поголемиот дел од Западна Европа во текот на навистина долг период од летото ги предизвикува топлотните бранови над копното и океанот“, рече Фридерике Ото, научничка во Центарот за еколошка политика при Империјал колеџ во Лондон и коавторка на извештајот. „Тие дефинитивно се поврзани.“

Топлите мориња придонесуваат и за топлината на копното, создавајќи повратна спрега, рече Ото. Морската вода ја задржува температурата подолг временски период, поради што морските топлотни бранови траат подолго, се зголемува влажноста во крајбрежните области и се спречува разладувањето, особено во текот на ноќта.

„За време на топлотните бранови на копното, влажноста што доаѓа од океанот може да биде исклучително смртоносна“, рече Грегори. „Тоа го видовме во Југоисточна Азија или во Индија за време на монсунските сезони, но го гледаме и во Јужна Европа.“

Истражувачите ги анализирале температурите на морето во текот на последните две недели од јули и ги споредиле со претходните морски топлотни бранови и со историските просеци. Тие утврдиле дека температурите во Бискајскиот Залив и долж западниот дел на Пиринејскиот Полуостров се зголемиле за 1,5 Целзиусови степени, додека источниот дел на Средоземното Море се загреал за 2,6 степени, а западниот дел за 3,1 степен. Со сегашното темпо на затоплување, екстремните морски топлотни бранови забележани ова лето се очекува до крајот на векот да бидат за 1,3 до 1,9 Целзиусови степени потопли.

Европските лета сега се поврзуваат со поекстремни морски топлотни бранови, но брзото затоплување сега почнува порано и трае подолго, покажува извештајот.