При контролите спроведени од страна на Агенцијата за храна и ветеринарство (АХВ), најчесто констатираме безбедна храна, но во одредени случаи во процесот пред сè на производство, а потоа и во процесот на дистрибуција, па и чување на производот, можат да настанат одредени промени, вели во разговор за „Блумберг Адрија ТВ“, директорот на АХВ, Николче Бабовски.
Тој нагласува дека годинава имало повлекување на повеќе различни производи, некои и од светски брендови.
„Имаше јогурт, млеко, виршли, чипсови, бисквити, колачи, сладолед, повлечени по извесувања добиени од системот за брзо предупредување и информирање во рамки на ЕУ. За тие производи наложивме да се повлечат од рафтовите. Најверојатно, во текот на производствениот процес дошло до одредено отстапување и се најдени контаминенти во храната што не се дозволени и не се безбедни по здравјето на луѓето“, вели Бабовски, но додава дека нема простор граѓаните да бидат во паника бидејќи таквите контаминенти треба да се внесат во огромни количини за да настанат одредени здравствени проблеми.
Граѓаните кои купиле небезбеден производ за кој АХВ дала налог да се отповика и да се повлече, доколку сè уште не го отвориле можат да го вратат кај продавачот и за тоа да добијат поврат на средствата.
„Доколку производот е отворен и се наоѓа во домашни услови треба веднаш да се фрли бидејќи не е безбеден, а доколку веќе консумирале од него, без разлика дали чувствуваат или не чувствуваат здравстевени проблеми, добро е да се јават кај својот матичен лекар“, објаснува директорот на АХВ, според кого пред сè треба да постои општествена одговорност од страна на производителите и трговците.
„Поголема казна од тоа производителите да ја загубат довербата кај потрошувачите за нивниот бренд, мислам дека нема“, нагласува Бабовски.
Целиот разговор со него проследете го на видеото прикачено во рамки на објавата.
.webp){kind=icon}
