Италијанските власти оваа недела почнаа да запленуваат една од најголемите светски мрежи на онлајн лажни продавници што ги измамија потенцијалните клиенти така што се појавија дека нудат стоки со попуст од луксузни брендови, како што се „Џорџо Армани“ (Giorgio Armani SpA) и „Прада“ (Prada SpA), кои никогаш не се реализираа.
„Незаконската мрежа од повеќе од 13.000 онлајн лажни продавници, откриена од италијанската компанија за сајбер-безбедност ’Јарикс’ (Yarix), наводно е управувана од група кинески сајбер-криминалци“, тврдат лица запознаени со ова прашање, кои побараа да не бидат именувани бидејќи станува збор за доверливи информации.
Портпаролот на „Јарикс“ потврди дека компанијата активно помага во голема истрага, чија цел е да се отстранат лажните е-продавници. „На истрагата подоцна би можеле да ѝ се приклучат и агенциите за спроведување на законот од други европски земји и САД“, додаде портпаролот.
Официјални лица на италијанската агенција за спроведување на законот „Полиција постале“ (Polizia Postale) вчера почнаа да уриваат некои од овие дигитални лажни продавници поврзани со италијански брендови, велат изворите.
Овие страници се добро дизајнирани имитации на вистинските корпоративни интернет-страници, а клиентите обично се мамат поради намалените цени. „Но не се вршат испораки, а интернет-страниците генерално вклучуваат вистинска платформа за плаќање со кредитна картичка, што се користи за кражба на финансиските податоци на купувачите“, велат изворите.
Претставник на италијанската „Полиција постале“ ја потврди операцијата и одби да коментира детали.
„Тоа што го откривме е координирана инфраструктурна мрежа на добро осмислени и дизајнирани лажни продавници низ целиот свет, кои во последните две години веројатно украле десетици милиони евра или долари од клиентите, кои во ништо не се посомневале“, рече Мирко Гато, главен извршен директор во „Јарикс“, во телефонско интервју.
Италијанските модни брендови што се цел на криминалната мрежа се „Брунело Кучинели“ (Brunello Cucinelli), „Долче и Габана“ (Dolce & Gabbana), „Ерменеџилдо Зења“ (Ermenegildo Zegna) и „Монклер“ (Moncler), велат изворите. „Сајбер-криминалците, исто така, беа насочени кон меѓународни спортски брендови како што се ’Најки’ (Nike), ’Адидас’ (Adidas) и ’Њу баланс’ (New Balance)“, велат тие.
„Повеќето од серверите и дигиталните платформи на лажните продавници што се пребаруваат во тековната истрага се наоѓаат во Панама, Турција и САД“, велат анонимните извори.
.webp){kind=icon}
