Чарли Џејвис, основачката на сајтот за студентска финансиска помош „Френк“ (Frank), изјави дека префрлила милиони долари од сметката во „ЏП Морган“ (JPMorgan Chase), откако била отстранета од банката и обвинета за измама, за потоа да се најде во центарот на колапсот на „Сигначур“ (Signature Bank). Целиот случај сега чека судска разврска.
Имено, „ЏП Морган“ ја купил страницата „Френк“ од Џејвис во 2021 година за 175 милиони долари, потврди таа во петокот во изјава пред федералниот суд во Делавер, а парите ги префрлила на сметка во „Сигначур“ во септември 2022 година.
„ЏП Морган“ прво ја испрати на принуден одмор, а потоа ја тужеше за измама, поради, како што велат, надуениот број на корисници на сајтот за време на преговорите за преземање.
„Моментот беше лош“, го коментираше преминот на Џејвис во „Сигначур“ нејзиниот адвокат, додавајќи: „На изненадување дури и на најискусните играчи во банкарската индустрија, на 10 март, или нешто приближно околу тој датум, штедачите на 'Сигначур' почнаа да 'бегаат', на тој начин зголемувајќи ги стравот и веројатноста за она што всушност следуваше, а тоа е третиот по големина банкарски колапс во историјата на САД“.
Џејвис го сподели своето искуство со повлекување депозити од „Сигначур“, што дојде како одговор на барањето на „ЏП Морган“ за информации за три лажни чадор-компании во Невада што имале сметки во „Сигначур“.
Таа рече дека можела да повлече пари од „Сигначур“ и да ги префрли во други „водечки домашни институции“. Но нејзините сметки беа запленети претходно овој месец од американските сојузни обвинители, кои ја обвинија за измама врз „ЏП Морган“.
„ЏП Морган“ во претходниот поднесок сугерираше дека Џејвис се обидувала да ги скрие средствата во своите фиктивни компании во Невада. „Какви докази и да имале од 'ЏП Морган' за да го спречат трошењето на средствата, сега се спорни“, рече Џејвис.
„ЏП Морган“ одби да коментира во понеделникот, а Џејвис беше ослободена од притвор со кауција од два милиона долари. Таа ги негираше наводите на „ЏП Морган“ во случајот за измама во Делавер и поднесе контратужба.
Во петокот, Џејвис рече дека нејзините трансфери биле разумни во однос на тужбата на „ЏП Морган“ против неа. Таа рече дека „повеќе не сака да работи со банка што ѝ се одмаздува и неосновано ја обвинува за сериозни престапи“.
.webp){kind=icon}
