Малкумина во Македонија ќе се израдуваат на веста дека според „Морган Стенли“ цените на половните рачни часовници од луксузните брендови „Ролекс“ „Патек Филип“ и „Одемар Пиге“ ќе продолжат да паѓаат бидејќи понудата останува висока. Причината е едноставна, и со пониски цени овие часовници ќе останат само сон за најголем број македонски граѓани. Од друга страна, информацијата дека автомобилските компании ги зголемиле профитите во првата половина од годинава повеќе од очекувањата може да биде причина за радост кај повеќемина со оглед на тоа што голем број делови за автомобилската индустрија се произведуваат во земјава. Денес, финансискиот свет ќе го очекува исходот од состанокот на ЕЦБ.
Добро утро, подолу петте вести што ги издвоивме за почеток на денот:
Наша анализа: ЕЦБ ќе ги зголеми каматите, не е за последен пат
Ново зголемување на каматните стапки за 25 базични поени од страна на Европската централна банка (ЕЦБ) на денешниот состанок, очекува аналитичкиот тим на „Блумберг Адрија“. Тоа би ја зголемило стапката на главните операции за рефинансирање на 4,25 проценти. Во таков случај стапката на депозитите преку ноќ за банките ќе изнесува 3,75 проценти, а 4,5 проценти на граничната позајмица - кредит преку ноќ на банките од евроосоставот.
„Упорноста за рестриктивност на монетарната политика всушност ја одразува истрајноста на базичната инфлација (инфлација по исклучување на енергијата, храната, алкохолот и тутунот) која сè уште е тврдоглаво висока и на ниво од 5,5 отсто во јуни 2023 година, вели Марина Петров, сениор аналитичарка за пазари во „Блумберг Адрија“.
Раст на каматите: Банките мува не ги лази, искушенијата се на друго место
Високата стапка на инфлација во изминатиов период ја принуди Народната банка да ја затегне монетарната политика преку континуирано покачување на основната каматна стапка и преку други инструменти. Тоа доведе до раст на каматите на кредитите односно зголемување на трошоците за задолжување на македонските компании. Анализиравме како влијае рестриктивната монетарна политика врз ризиците кај македонските банки и како се рефлектира врз работењето на македонските компании.
Блумберг Адрија
Од Народната банка велат дека банките управуваат со каматниот ризик во рамките на пропишаните регулаторни лимити, што на редовна основа се следи и оценува од страна на Народната банка. Оттаму додаваат дека за домашните банки е поважна изложеноста на кредитниот ризик, која произлегува од изложеноста на нивните клиенти на каматен ризик, а поради значајното присуство на кредитите со приспособлива или променлива каматна стапка.
Анкетиравме: Каматите станаа огромен товар за домашните компании
Постојаниот раст на каматните стапки, процес што започна со постојаното затегнување на монетарната политика, ја става на тест издржливоста на домашните компании. Значителниот раст на финансиските расходи значеше забавување на инвестициите и развојот на домашните компании. Оваа ситуација дополнително ја отежнува континуитетот на криза, кој започна со пандемијата, на која се надоврза енергетската криза, која значително ги зголеми трошоците на компаниите.
Каматните стапки на кредитните производи, затоа, во ова време станаа голем предизвик за компаниите, а тој процес најверојатно нема да заврши наскоро. За дел од компаниите растот на каматите е причина за намалена ликвидност, додека за дел значи застој во планот за инвестирање. Стопанствениците сметаат дека ако каматите се зголемат дополнително, тоа може да значи и пад на целокупната економија во земјава.
„Дојче банк“ ја чувствува лошата страна од зголемувањето на каматите
Дојче банк“ (Deutsche Bank AG) почнува да ја чувствува негативната страна на зголемувањето на каматните стапки. Најголемиот германски заемодавец во средата објави пад на заемите предизвикан од намалената побарувачка во неговите комерцијални банкарски операции. Кредитниот квалитет во меѓувреме почнува да се влошува, зголемувајќи ги провизиите за лоши заеми за 72 отсто од пред една година, на највисоко ниво во последните три години.
„Видовме одредено омекнување“ во квалитетот на заемот, рече главниот финансиски директор Џејмс фон Молтке во интервју за телевизијата „Блумберг“, издвојувајќи ги комерцијалните недвижности на глобално ниво и средните компании во Германија.
Засега не се очекува ценовен шок за пелетите
Владата најави, па се повлече од намерата за враќање на ДДВ од 5 на 18 отсто за пелетите. Во меѓувреме, пак, на пазарот настанаа мала паника и зголемена побарувачка, но состојбата полека се смирува, вели во интервју за „Блумберг Адрија“ Владимир Стојановски од Здружение на производители и увозници на пелети.
„Кога се најави мерката имаше зголемена побарувачка и малку тешко се одговараше во тие денови, но, за среќа, кратко траеше тоа. Ние брзо реагиравме, се обративме до сите пратенички групи во Собранието, имавме средби и испративме наши аргументи против зголемувањето на ДДВ. За среќа, имаше слух дека огревот не е луксузно добро и брзо се ретерираше и веќе имаме некое стабилизирање на пазарот, каде што побарувачката е нормална“, вели Стојановски.
.webp){kind=icon}
