Против Македонија се водат арбитражни постапки во вредност од 1,365 милијарда евра

Против државата во моментов се водат арбитражни постапки со проценета вредност од 1,365 милијарда евра. Сите постапки се за периодот пред 2017 година, кога се настанати наводните прекршувања на меѓународните договори за заштита на инвестиции, информира денеска вицепремиерот за економски прашања Фатмир Битиќи.

Во моментов има пет активни арбитражни постапки што се водат против државата, а две се завршени во наша корист и нема штета. Во еден од предметите дури е исплатен надомест кон државата од три милиони евра.

„Несовесното раководење, договорите во четири очи, негрижата за јавното добро и годините на владеење на тогашното ВМРО-ДПМНЕ ја изложуваат нашата држава на ризици и парите на нашите граѓани, наместо да бидат употребени за развојни проекти, сега ќе треба да се користат за одбрана на државата и нејзините интереси пред меѓународните спорови“, рече Битиќи на денешната прес-конференција во Владата.

Битиќи, кој е и претседавач на Координативното тело за арбитражни постапки, нагласи дека се преземени сите правни дејства и навремено се почнати сите процеси за соодветна заштита на правните интереси на државата и јавните добра. Тој укажа дека ненавременото преземање правни дејства ќе значи евентуално губење спорови пред арбитражните судови. Токму затоа, како што додаде, во 2017 година е формирано Координативното тело за следење арбитражни постапки произлезени од меѓународни договори.

Како што информира Битиќи, последната постапка што е поведена деновиве е од групацијата „Амадеус и Амадеус дивелопмент ДООЕЛ“ за случајот „Шпански скали“.

„Прелиминарното барање на тужителот е да платиме отштета за наводно претрпена загуба во износ што моментално се проценува на не помалку од 110 милиони американски долари“, рече Битиќи и додаде дека групацијата требало да гради комерцијална зграда и хотел во Скопје, а барала и изградба на скалила познати како шпански скали.

Тој нагласи дека токму проектот „Шпански скали“ е предмет на кривично гонење во земјава за вмешаните во постапките и додаде дека во овој момент тужителот има наведено само површни наоди и аргументи без докази и документација како поддршка и поткрепа на тврдењата дека Општина Центар го спречила градењето на објектот.

Втората постапка што е поведена деновиве, како што посочи Битиќи, е од страна на „ФЦЛ амбиенте“, за случајот „Приватен партнер на депонијата Дрисла“.

„'ФЦЛ амбиенте' бара надомест од трибуналот за прекршување според договорот за меѓусебно поттикнување и заемна заштита на инвестициите што го имаме со италијанската влада од 26 февруари 1997 година и меѓународните закони. Во оваа постапка износот на побарувањата не е наведен од страна на побарувачот и се нагласува дека ќе биде утврден во текот на постапката“, појасни Битиќи.

Тој процени дека двата нови спора ќе траат најмалку две-три години и истакна дека доброто правно застапување е важно за угледот на државата, зашто добиениот спор пред меѓународните судови го потврдува владеењето на правото и дава позитивен сигнал пред инвеститорите.

Вицепремиерот наедно посочи дека пред државните органи треба да одговараат тие што предизвикале или придонеле да се изгуби арбитражна постапка.

Во моментов нема коментари за веста. Биди прв да коментира...

Остави коментар