„ФЦЛ амбиенте“ поведе арбитража против Македонија за „Дрисла“

Италијанската компанија „ФЦЛ амбиенте“ (FCL Ambiente) поднесе тужба до Меѓународниот центар за решавање инвестициски спорови (ICSID) против Македонија за прекршување на договорот за управување со депонијата „Дрисла“, дознава „Блумберг Адрија“.

Овој случај датира од јануари 2013 година, кога Град Скопје по меѓународен тендер за јавно-приватно партнерство ѝ го додели договорот односно концесијата за управување со „Дрисла“ на италијанската компанија. За таа цел, јавното претпријатие беше трансформирано во друштво со ограничена одговорност, во кое Италијанците имаа сопственост од 80 проценти, а преостанатите 20 проценти беа во сопственост на Град Скопје. Резултатите од тендерот поради сомнеж за нерегуларности ги оспорија конкурентните фирми-учеснички од Германија и од Австрија.

Во согласност со договорот, италијанската компанија требаше да инвестира во основна инфраструктура, опрема и капацитети за преработка на отпад. Вкупната инвестиција во осовременување на „Дрисла“ требаше да биде над 70 милиони евра.

По предлог на поранешниот градоначалник Петре Шилегов, Советот на Град Скопје ја поништи одлуката за трансформација на „Дрисла“ во друштво со ограничена одговорност и таа во јануари 2020 година повторно беше регистрирана како јавно претпријатие.

Засега нема детали каква отштета побарува „ФЦЛ амбиенте“ и кои се главните аргументи за поведувањето арбитражна постапка.