„Керинг“ му го продава козметичкиот сектор на „Лореал“ за 4,7 милијарди долари

„Керинг“ (Kering SA) се согласи да му го продаде својот козметички сектор на „Лореал“ (L’Oreal SA) како дел од долгорочен стратешки сојуз, при што извршниот директор Лука де Мео има цел да ја обнови успешноста на францускиот луксузен гигант.

Компанијата, која е сопственик на модни брендови, меѓу кои и „Гучи“ (Gucci), соопшти дека зделката има цел да го забрза растот.

Вредноста на зделката изнесува 4 милијарди евра (4,7 милијарди долари), сe наведува во соопштението на двете компании објавено синоќа. 

„Керинг“ го формираше својот козметички сектор во 2023 година. Истата година го презеде луксузниот бренд за парфеми „Крид“ (Creed) за околу 3,5 милијарди евра, со цел да ја изгради својата козметичка платформа, но оттогаш се соочува со посериозни предизвици.

Како дел од зделката, „Лореал“, најголемиот светски производител специјализиран за козметика и убавина, ќе ја додаде „Крид“ во своето портфолио.

„Обединувањето со глобалниот лидер во козметиката ќе ни овозможи да го забрзаме развојот на парфемите и козметичките производи за нашите водечки брендови, овозможувајќи им да постигнат поголем обем и да го ослободат својот огромен долгорочен потенцијал“, изјави Де Мео во соопштението.

Продажбата претставува прв стратешки потег на Де Мео, кој официјално ја презеде функцијата во септември, во време кога „Керинг“ се соочува со пад на побарувачката во Кина и со закана од зголемените царини во САД. Големиот долг на групацијата исто така предизвика загриженост кај инвеститорите.

Извршниот директор, кој го наследи Франсоа-Анри Пино, се очекува напролет да ја претстави својата стратешка визија. Семејството Пино е мнозински сопственик на „Керинг“ со 42 отсто удел и 59 отсто од правата на глас.