„Керинг“ (Kering SA), сопственикот на брендот „Гучи“ (Gucci), одлучи да го купи производителот на парфеми „Крид“ (Creed), со цел да го прошири своето присуство на пазарот на луксузни мириси.
Одделот за убавина на „Керинг“ купува стоотстотен удел во „Крид“ со средства контролирани од „Блекрок“ (BlackRock Inc.) и актуелниот претседател Хавиер Феран, соопшти групацијата со седиште во Париз. Дополнителни детали за трансакцијата не беа откриени. Цените на акциите на „Керинг“ пораснаа на самиот почеток на ова купување за 1,5 отсто.
„Крид“ е основана во 1760 година, од страна на Џејмс Хенри Крид, како кројачка куќа што работела за европските кралски семејства. Во брендот сè уште има семејна вклученост.
Француската групација соопшти дека планира да го „отклучи“ потенцијалот на „Крид“, особено на кинескиот пазар и во продажбата во фришопови, додека истовремено го проширува своето портфолио на женски мириси. Компанијата, позната по својот машки парфем „авентус“ (Aventus), оствари годишен приход од повеќе од 250 милиони евра во периодот до 31 март.
Аквизицијата доаѓа откако „Керинг“ ја назначи Рафаела Корнаџо да го води одделот за убавина во февруари, бидејќи компанијата има цел да расте во сегмент каде што конкурентите „Хермес“ (Hermes International) и ЛВМХ (LVMH Moet Hennessy Louis Vuitton SE) веќе објавија силни резултати.
Qilai Shen/Bloomberg
„Керинг“ собираше средства за потенцијални аквизиции во последниве години, собирајќи значителен износ со продажбата на својот удел во „Пума“ (Puma SE).
Минатата година „Керинг“ беше во преговори за купување на брендот „Том Форд“ (Tom Ford), познат по својата линија на парфеми, според информации обелоденети од упатени извори. Претставник на „Керинг“ тогаш одби да ги коментира овие информации. „Том Форд“ на крајот беше купен од компанијата „Есте Лаудер“ (Estee Lauder).
Обнова на Гучи
„Керинг“ сега се обидува да го оживее својот најголем бренд, „Гучи“. Во април беше откриено дека продажбата на „Гучи“ едвај пораснала во првиот квартал, бидејќи италијанскиот бренд не успеа да привлече повеќе клиенти за производите како што се ремени со логото „дабл џи“ (double G) и крзнени папучи од Принстаун (Princetown).
Перформансите на „Керинг“ се чинат особено слаби во споредба со конкурентите ЛВМХ и „Хермес“, кои забележаа двоцифрен раст на продажбата во првиот квартал.
Извршниот директор Франсоа-Анри Пино тогаш изјави дека иако перформансите биле нерамномерни, брендот почнува да покажува „постепено подобрување во активноста од месец на месец“. За да го обнови „Гучи“, компанијата го назначи Сабато де Сарно, поранешен вработен во „Валентино“ (Valentino SpA), за нов креативен директор. Првата колекција ќе ја претстави во септември во Милано.
„Керинг“ претходно посочи дека се обидува да го зајакне својот сегмент за убавина, но лиценците за брендови се во рацете на конкурентите. „Коти“ (Coty Inc.) ја поседува лиценцата за „Гучи“. Пино во февруари рече дека неговата група ќе се обиде да ја преземе лиценцата кога таа повторно ќе стане достапна, но не елаборираше за временската рамка.
Во меѓувреме, „Керинг“ ќе развива мириси за брендовите „Ботега Венета“ (Bottega Veneta), „Баленсијага“ (Balenciaga) и „Александер Меквин“ (Alexander McQueen), за кои поседува лиценци, додаде Пино.
„Стекнувањето на ’Крид’ не е изненадување, со оглед на планот на ’Керинг’ да расте во козметичкиот сектор и потребата да се создаде критична маса пред лиценцата за ’Гучи’ да се врати на самата компанија во 2028 година“, наведе аналитичарот на „Морган Стенли“ (Morgan Stanley), Едуард Обин, во белешка по објавата.
„Лореал“ (L'Oreal SA) ја поседува и лиценцата за брендот за убавина „Ив Сен Лоран“ (Yves Saint Laurent) и го произведува популарниот парфем „либре“ (Libre). Претходно годинава извршниот директор на „Лореал“ (L'Oreal), Николас Јеронимус, изјави дека не постои ризик лиценцата да биде преземена од „Керинг“. „Ив Сен Лоран“ е вториот најголем моден бренд на „Керинг“, по „Гучи“.
.webp){kind=icon}
