Секое лето, на средината од август, Сараево се претвора во центар на регионот што пулсира со енергија на филмот и уметноста. Улиците се исполнети со туристи од целиот свет, хотелите се полни, угостителскиот сектор бележи рекорди, а градот станува епицентар на филмската уметност. Сараевскиот филмски фестивал (СФФ) не е само настан – тој е двигател на економскиот и општествениот живот, препознаен како една од најважните филмски манифестации во Југоисточна Европа.
Фестивалот свечено ќе го отвори филмот „Павилјон“ на босанскохерцеговскиот режисер Дино Мустафиќ, кој премиерно ќе биде прикажан в петок, 15 август. Ова силно остварување ја раскажува приказната за бунтот на станарите во дом за стари лица – луѓе што, лишени од иднина, одлучуваат да ја преземат сегашноста во свои раце.
Филмот обединува импресивна актерска екипа, во која меѓу другите се Раде Шербеџија, Зијах Соколовиќ, Мирамел Зубчевиќ, Ксенија Паиќ и Јасна Диклиќ.
Педесет филма во трка за „Срцето на Сараево“
Во конкуренција за наградите „Срцето на Сараево“ е натпреварувачката програма, која годинава вклучува 50 филма распределени во четири селекции – игран, документарен, краток и студентски филм. Гледачите ќе имаат можност да присуствуваат на 16 светски, пет меѓународни, 28 регионални и две босанскохерцеговски премиери.
„Главниот фокус на годинашните натпреварувачки програми го сочинуваат филмови што, надминувајќи ги националните граници, им остануваат верни на универзалните приказни што ги обликуваат нашите животи. Во тој опсег од теми што се занимаваат со сегашноста до оние што го преиспитуваат минатото – оваа селекција отвора простор, преку филмските приказни, да се потсетиме на она што ни е на сите заедничко: потребата за смисла, за блискост, за разбирање – на себеси и на другите“, изјави креативната директорка на фестивалот Изета Граѓевиќ.
СФФ
Вилем Дефо, икона на светската глума со повеќе од 150 улоги, ќе го добие „Почесното срце на Сараево“ за исклучителен придонес во филмската уметност. Познат по својата смела посветеност на секој лик, Дефо ќе одржи и мастерклас, каде што со публиката и младите професионалци ќе ги сподели своите искуства и визии.
Признанија ќе им бидат врачени и на актерските великани Реј Винстон и Стелан Скарсгард, чии имиња се синоним за силен и автентичен филмски израз.
Годинешниот фестивал му оддава почит и на еден од најзначајните современи европски автори – Паоло Сорентино. Во рамките на програмата „Посветено“, публиката ќе може да погледне ретроспектива на неговите филмови, а самиот режисер, преку мастерклас и разговор со публиката, ќе ги отвори вратите кон својот креативен свет.
Сараево за време на СФФ бележи рекорди во туризмот
Минатогодишното, јубилејно 30. издание го донесе најголемиот туристички промет во историјата на градот. За време на фестивалските денови биле регистрирани речиси 40.000 пристигнувања и над 83.000 ноќевања, а бројот на туристи пораснал за 16,5 отсто во однос на 2023 година и дури 71,9 отсто во однос на 2019 година.
Кенан Магода, министер за култура и спорт на кантонот Сараево, во разговор за телевизијата „Блумберг Адрија“ истакна дека СФФ е најдобриот бренд на Босна и Херцеговина уште од времето на Зимските олимписки игри во 1984 година.
СФФ стана најпрепознатливиот симбол на современата БиХ, не само културно туку и туристички, нагласи Магода.
Тој додаде дека БиХ генерално има многу малку филмски продукции, но е направен значаен исчекор. Владата на кантонот Сараево го започна процесот на основање фондација за кинематографија, како трајна институција што системски ќе се занимава со развој на филмската индустрија. Магода предупреди дека не смее да се пропушти моментот и да се дозволи на најзначајната филмска манифестација во земјата – СФФ – да не биде прикажан ниту еден филм од БиХ.
Тој потсети на силната порака: „Кога ќе застане културата, застанува и светот“.
Тој исто така истакна дека прогласувањето на Сараево за најдобар град за посета во 2025 година, според изборот на читателите на „Нешнал џиографик травел“ (National Geographic Travel),имало силно влијание врз доаѓањето на туристи и дополнително ја зацврстило позицијата на градот како регионален културен и туристички центар.
Покрај филмот, во деновите на СФФ, градот станува модна писта под отворено небо, каде што стилски се изразуваат и гостите и домаќините. Фестивалот не е само во салите туку и во кафеаните, галериите и во доцните ноќни разговори под светлата на градот.
Се гледаме во Сараево – од 15 до 22 август!
.webp){kind=icon}
Во моментов нема коментари за веста. Биди прв да коментира...