text size
Како да се освежи легендарна колекција што е основа на бизнисот?
Во случајот на „Ван Клиф и Арпелс“ (Van Cleef & Arpels) и нивната позната линија „Алхамбра“ (Alhambra), одговорот е – преку суптилни трансформации. Овој месец француската куќа за накит додава парчиња што можат да се носат на повеќе начини.
Првото е долг ѓердан „Меџик Алхамбра“ (Magic Alhambra), со додаток што може да биде уште еден слој на ѓердан или да се претвори во белезица. Второто е прстен во стилот „Винтиџ Алхамбра“ (Vintage Alhambra), со две лица, кој доаѓа во комбинации од розово злато и сив седеф или бело злато и халкедон со дијамант. Оној што го носи може да го заврти прстенот и да ја избере страната во согласност со расположението.
Новиот ѓердан Magic Alhambra може да се претвори во белезица | Van Cleef & Arpels
Оваа можност за трансформација е дел од ДНК-дизајнот на „Ван Клиф и Арпелс“ уште од средината на 20 век. Најпознатиот пример е прочуениот ѓердан „Зип“, кој се отвора и затвора како патент – парче што во 1938 година го нарача Волис Симпсон, војвотката од Виндзор, а беше произведено дури во 1951 година. Денес тоа сè уште е заштитен знак на куќата.
Колекцијата „Алхамбра“ – прстени, белезици, часовници и ѓердани – е позната по мотивот на четирилисна детелина опкружена со златни зрнца. Самата форма на детелината е изработена од полускапоцени камења како малахит и карнеол, резбарено злато или сив седеф.
Со оглед на тоа колку е оваа линија важна за париската куќа за накит, разговаравме со извршната директорка Кетрин Рение за тоа како се носат одлуките за измените и новитетите.
Како ја одржувате свежа линијата како „Алхамбра“?
„Алхамбра“ е родена во 1968 година и оттогаш е постојан дел од изразот на нашата куќа за накит. Симболиката на „Алхамбра“ – среќа и позитивен поглед на животот – е дел од нашата филозофија уште од самите почетоци. Новата колекција си игра со големините на мотивот, нешто што го започнавме со „Меџик Алхамбра“ во 2006 година, но сега додаваме и елемент на трансформација – долг ѓердан што станува краток или се претвора во белезица. Ова е првпат да ја пренесеме таа идеја во „Алхамбра“.
Дури и по сите овие години работа во куќата, секојпат кога ќе видам нов камен или нова боја во „Алхамбра“, имам чувство како да гледам сосема нова колекција. Секоја нова верзија носи нова енергија и идентитет.
Кој одлучува кои камења ќе се користат?
Нашиот „висок совет“ го сочинуваат експерти за камења. Клучното прашање е дали квалитетот на каменот ги исполнува нашите стандарди и дали го има доволно на пазарот. Понекогаш бојата или материјалот нè инспирираат толку многу што ги вклучуваме во колекцијата иако количествата се ограничени. Тоа се нашите „ретки материјали“ – знаеме дека никогаш нема да ги има доволно за масовниот пазар, но тие ѝ додаваат наратив и идентитет на Алхамбра. На пример, тиркизот и лапис-лазулот се присутни веќе долго време, но во мали количества, бидејќи нивното набавување е исклучително ограничено.
Колкав дел од вашиот бизнис го сочинува „Алхамбра“?
Не можам да споделувам бројки. Се разбира, тоа е иконска колекција за нашата куќа. Но поважно од бројките е тоа што „Алхамбра“ ја изгради свеста за брендот „Ван Клиф и Арпелс“ кај пошироката публика. Откако е создадена, остана наш заштитен знак – благодарение на стилот, играта на бои и постојаната способност да се освежува.
Catherine Rénier | Van Cleef & Arpels
Дали би ги користеле мотивите на „Алхамбра“ на кожени производи, како чанти?
Работевме на слични проекти во минатото, но сфативме дека сакаме да останеме таму каде што сме најдобри – во накитот. Тоа го работиме веќе сто години и научивме дека нашата вистинска уметничка експресија е во она што сме го усовршиле: накитот и, секако, часовниците. Не гледаме смисла да навлегуваме подлабоко во области во кои не би можеле да додадеме иста вредност преку занаетчиската умешност.
Колку ви е важно да го проширите сегментот на финиот накит надвор од „Алхамбра“?
Не повеќе од порано. Секогаш сме биле исклучително креативни. Создавањето нови симболи и начини за повторно толкување на нашето наследство ги инспирира и мотивира нашите занаетчии. Оваа година, на пример, ја лансиравме новата колекција „Флауерлејс“ (Flowerlace), со цветни форми во злато. Се трудиме постојано да наоѓаме инспирација – не само во високиот туку и во финиот накит. Токму тоа ни дава поттик за креативност.
.webp){kind=icon}
