Година за заборав за француските милијардери од луксузот

За најголемите милијардери во Франција, 2024 година беше година за заборав, бидејќи нивното комбинирано богатство се намали за рекорден износ поради слабата побарувачка за луксузни стоки и политичката нестабилност.

Бернард Арно, Франсоаз Бетанкур Мајерс и Франсоа Пино, меѓу најбогатите во светот, изгубија околу 70 милијарди долари од нивното колективно богатство годинава, според индексот на милијардери на „Блумберг“. Гигантите од индустријата што ги контролираат - ЛВМХ (LVMH), „Лореал“ (L’Oréal SA) и „Керинг“ (Kering SA) - се меѓу најголемите губитници на француската берза, при што сопственикот на „Гучи“ (Gucci) изгуби 41 отсто од својата вредност.

Триото забележа значително намалување на своето богатство поради распродажбата во компаниите за луксузни добра и лична нега. Кинеските купувачи го забавија трошењето за кожени производи, дизајнерски фустани и козметика за нега на кожа, додека компании како што е етикетата „Гучи“ на „Керинг“ се борат со ново раководство и стратегија. Нестабилната политика на Франција - вклучувајќи го и падот на владата на Мишел Барние месецов - исто така го намали апетитот на инвеститорите за француски производи.

„Кинеските потрошувачи требаше да бидат двигател на растот во 2024 година, но тоа не се оствари“, рече Аријан Хајате, менаџер на фондови во ЕРАМ (Edmond de Rothschild Asset Management). „Исто така, постои замор од луксуз по три години извонреден раст, бидејќи одмаздничкото трошење избледе“.

Бернард Арно Bloomberg

Продажбата на луксузни стоки и козметика се зголеми за време на пандемијата, бидејќи потрошувачите трошеа на врвни брендови со резерви акумулирани за време на ограничувањата во пандемијата. Тие динамики му помогнаа на основачот на ЛВМХ, Арно, да се искачи на првото место на листата на богатство на „Блумберг“. Сега е на петтото место и досега изгубил повеќе - 31 милијарда долари - од кој било друг меѓу 500-те најбогати луѓе во светот. Што се однесува до наследничката на „Лореал“, Бетанкур Мајерс, таа долго време беше најбогатата жена во светот и минатата година стана првата жена што имала богатство од 100 милијарди долари. Сега ги изгуби двете круни.

„За луксузот, ова навистина е враќање во реалноста“, рече Кевин Тозе, член на инвестицискиот комитет во „Кармињак“ (Carmignac) во Париз. „Она што се случува од 2023 година е нормализација“.

Пино (88), кој ја основа компанијата што еволуира во „Керинг“, исто така забележа значително намалување на богатството, кое опадна за 64 отсто, на 22 милијарди долари од врвот во август 2021 година. Тоа е најголемиот процентуален пад на кој било што сè уште е на индексот на богатство на „Блумберг“ во тој период и главно се должи на проблемите со неговата најголема модна етикета, „Гучи“.

Франсоаз Бетанкур Мајерс Bloomberg

Падот на богатството на Пино се случи додека „Керинг“ беше под надзор на неговиот син, Франсоа-Анри Пино, 62, кој го насочи царството кон луксуз од мешавината на малопродажни средства. Сепак, за време на неговиот мандат, „Керинг“ остана во голема мера зависен од „Гучи“, чиј успех се менуваше. Кланот Пино поседува 42 отсто од акциите и 59 отсто од правата на глас во „Керинг“ со седиште во Париз, чии акции паднаа по низа предупредувања за профитот.

Европските луксузни акции доживеаја пад, иако само пред две години беа гледани како алтернатива за раст на континентот наспроти „величествената седумка“ на Волстрит составена од големите технолошки мегакомпании.

Сепак, забавувањето не ги погоди сите луксузни брендови еднакво. Продажбата на „Хермес“ (Hermes) се зголеми во текот на третиот квартал поради позиционирањето на производите кон најбогатите клиенти, чие трошење е поотпорно од тоа на помалку богатите клиенти.

Depositphotos

Како што се приближува крајот на годината, почнуваат да се појавуваат знаци на оптимизам за поширокиот сектор, при што инвеститорите се обидуваат да се позиционираат за потенцијално враќање.

Продажбата во Кина не се влошува понатаму и заживува во САД, според аналитичарите на ХСБЦ (HSBC Holdings Plc), кои велат дека дното било допрено во третиот квартал годинава.

„Да бидеме искрени, имаме FOMO (страв од пропуштање)“, посочуваат аналитичарите на ХСБЦ, вклучувајќи го и Ерван Рамбур, во неодамнешна белешка до инвеститорите. „Имаме уверување дека продажбата во Кина не станува полоша и дека продажбата во САД по изборите се подобрува. Тоа се двата кластера што се важни“.

„Амунди“ (Amundi SA) штотуку го објави лансирањето нов фонд за тргување на берза, или ЕТФ (ETF), за луксузни акции, наведувајќи ги перспективите за раст на долг рок, вклучувајќи ги и проширувањето кон средната класа на пазарите во развој, атрактивноста на некои брендови и зголемената побарувачка за врвни производи.

Можноста дека најлошото е завршено за секторот предизвика зајакнување на некои акции на луксузни и козметички производи од почетокот на декември. Индексот за производи и услуги за широка потрошувачка Stoxx 600 Europe е зголемен за околу пет отсто месецов, што е најдобра изведба од февруари.

„Технологијата ја презеде водечката улога пред луксузот годинава, но луксузот може да се врати во текот на 2025 година“, смета Хајате од ЕРАМ. „Можам да замислам закрепнување на секторот од втората половина на 2025 година“.