Конференција на „НЛБ Банка“: Иднината е тука, приспособете се на вештачката интелигенција

Гледајте го филмот „Her“ за да сфатите дека иднината е веќа тука. Ова беше главната препорака на Антонио Аргир, член на Управниот одбор на „НЛБ Љубљана“ по разговорот со Габриел Гита, заменик претседател на Центарот за кориснички решенија за Југоисточна Европа во „Мастеркард“. Разговорот на тема „Иднината на плаќањата и новите хоризонти“ се водеше на сцена во хотелот „Холидеј Ин“ пред публиката што присуствуваше на конференцијата „NLB Next – Иднината на банкарството“, којашто се одржа во Скопје по повод јубилејните 40 години од постоењето на банката.   

Антонио Аргир

Каква ќе биде иднината на плаќањата и како новите технологии, пред се вештачката интелигенција ќе го обликуваат банкарскиот сектор, меѓудругото, беа клучни точки на разговорот меѓу двајцата финансиски експерти.

Гита рече дека не би се осмелил да ја претскажува иднината, но дека постојат трендови во однос на плаќањата кои што веќе се забележливи.  

„Конкуренцијата во платежната индустрија никогаш не била поголема. Порано „Мастеркард“ и „Виза“ беа единствени глобални џинови, и тие се уште се, но конкуренцијата сега е многу поголема, а карактеристично е тоа што таа не се обидува да го земе нашиот дел, туку како и ние се натпреварува за плаќањата што се во кеш“, вели Гита.

Тој додаде дека постојат два главни трендови во платежната индустрија и дека првиот се однесува на малопродажбата, каде што приоритет е токенизацијата односно зголемување на сигурноста при плаќањата преку картички.  Вториот тренд се однесува на таканаречните директни плаќања (B2B), што е многу поголем залак за освојување.

„Има масовен напад од конкуренцијата во овој вид плаќања. Ако сметаме дека има голема конкуренција во однос на плаќањата во малопродажбата, тогаш кај B2B плаќањата степенот на конкуренција е на лудо ниво“, вели Гита.

Аргир го наметна и прашањето за големиот број транскации во регионот што се уште реализираат во кеш, што потенцијално може да биде извор на корупција. Тој праша дали има примери коишто покажуваат дека дигиталните плаќања можат да ја подобрат состојбата.

Гита посочи дека има примери во повеќе земји каде што со регултива е воведена дигитализација во плаќањата односно фискална контрола на касите, но и дека се покажало дека администрацијата не е способна да го „свари“ огромниот број податоци коишто наеднаш пристигнале. Според него, државите не треба да застанат само кај дигитализацијата туку и преку редовна контрола да го подобрат својот фискален капацитет.

Габриел Гита

Во разговорот меѓу двајцата експерти беше зачнато и прашањето за роботизација односно користењето на модерните технологии како вештачка интелигенција во дигиталните плаќања, пред се преку користење на ВИ-агенти во интернет трговијата. Двајцата соговорници се согласија дека нештата што некогаш сме ги гледале на филмовите денеска веќе се случуваат.

На конференцијата се обрати и Дејвид Кериган, технолошки футурист кој зборуваше за интеграцијата на вештачката интелигенција во банкарството. Според него, сегашните случувања со вештачката интелигенција, бран кој е релативно нов, од пред само три години,  драматично го менува начинот на кој работат компаниите.

Кериган вели дека промените се веќе почнати па наместо да вложуваат во човечки ресурси, дел од бизнисите денес мерат колку време вработените користат ВИ-алатки и инвестираат во ВИ-агенти кои преземаат задачи и интерно и во комуникацијата со корисниците.

Дејвид Кериган

„Се поставува прашањето што значи кога вашиот ‘колега’, дизајнер или дури менаџер ќе биде ВИ, бидејќи влегуваме во втора ера на ВИ – не само создавање, туку активно интервенирање во процесите на работа“, вели тој.

Луѓето веќе се потпираат на ВИ за избор на производи, а ВИ-агенти можат самостојно да ја направат целата набавка без човечко учество. Друг тренд е користењето на ВИ како финансиски советник, што веќе се применува во Велика Британија.

„Многу потрошувачи во иднина ќе бараат ВИ-агенти за да им ги одржуваат сметките. Тие ќе сакаат да користат вештачка интелигенција и нема да чекаат вие да се прилагодите. Предизвикот за вас е дали на потрошувачот вие ќе му понудите ВИ-агент или ќе дозволите да оди на друго место каде што ќе има на располагање ВИ -агент“; вели Кериган.

Тој ги повика присутните да се подготват за големиот бран промени што претстои и навреме да размислат како ќе ја прилагодат својата работа и секојдневие на новата технологија.

„Морате да реагирате брзо и да се подготвите за големиот бран на промени што доаѓа. Се уште не е доцна, но морате брзо да делувате затоа што наскоро може да стане доцна“, рече технолошкиот футурист.