Бродњак: НЛБ сака да биде банка што најмногу им значи на луѓето

Не славиме само 40 години од постоењето на „НЛБ Банка“ туку и 25 години откако „НЛБ групацијата“ ја презема сопственоста врз банката во Скопје, како и 205 години откако постои групацијата, рече во своето поздравно обраќање Блаж Бродњак, главeн извршен директор на „НЛБ Љубљана“ на конференцијата „NLB Next - Иднината на банкарството“ што по повод 40 години од основањето на банката се одржа во Скопје.   

Тој додаде дека корените на „НЛБ групата“ се од „Љубљанската штедилница“ која е основана 1820 година и била втора по големина во територијата на целата Хабсбуршка монархија. Бродњак рече дека станува збор за 205 години традиција на банкарство. Тој направи споредба меѓу предизвиците во тоа време и сегашната состојба во Европа. 

„Ако во периодот по индустријализација Средна Европа практично беше центар на светот, денес предизвиците се потполно поинкави. Европа денес е подзаспана во стари пари и хедонизам. Од 54 водечки технологии не создаваме веќе ниту една“, рече Бродњак.

Блаж Бродњак

Тој укажа дека за разлика од минатото кога Европа била водач во технологијата и визијата како напред во тој свет, во цивилизациска смисла и промовирање на мултикултурата, либералната демократија и мирот, денеска Европската Унија ја загубила конкуретноста.

„Ако некогаш тоа беше сојуз за зачувување на мирот, сега гледаме дека не може да го зачува мирот, а не пак да работи на конкуретноста“, рече Бродњак.

Тој се осврна на демографските предизвици и преселбите со кои се соочува регионот укажувајќи дека „ние сме едно заспано општество без деца“.  Бродњак како пример ја посочи состојбата во Љубљана која за 18 месеци доживеала радикална промена во однос на структурата на населението.

„Ако тоа продолжи, за 20 години ќе имаме 250.000 луѓе, а тие нема да доаѓаат од Македонија, Србија, Република Српска или БиХ, туку од Азија“, рече Бродњак.

Тој укажа дека тоа во суштина би ги сменило атрибутите на едно општество, со оглед на тоа дека станува збор за луѓе кои доаѓаат од различни култури, имаат различни прехранбени навики и друга историја.

Кога станува за банкарството, тој додаде за разлика од САД кадешто пазарот на капитал има главна улога во финансирањето на нови проекти, во Средна Европа се уште се наоѓаме во банко-центрични економии и дека банките се кичма на развојот. Тој укажа дека современето банкарство денес не е само вртење на парите на штедачите односно давање на кредити, туку дека нуди многу поширок дијапазон услуги како осигурување, инвестициски фондови и слично.

„Бил Гејтс пред 30 години изјави дека ни треба банкарство, ама не ни се потребни банки. Епа банките се тука и посилни се од кога било во историјата“, рече Бродњак.

Тој додаде дека има предизвици со појавата на финтек институции и необанкарство, но дека како домашна задача на НЛБ било да се подигне нивото на услуги за групацијата да стане носител односно „револут“ на модернизацијата во земјите од Западен Балкан. Во таа насока, истакна дека е горд што токму НЛБ е заслужна за воведувањето на „Епл пеј“ во Северна Македонија.

„Тоа е доказ дека сме посветени на развојот на современите услуги и тоа ќе биде така и во иднина“, рече Бродњак.

Тој истакна „НЛБ Банка“ е водечка банка во земјата во однос на кредитите за население и дека тоа е многу важно и останува фокус на целата групација. „Ние сакаме да бидеме банка што најмногу им значи на луѓето“, рече Бродњак, додавајќи дека истовремено се посветени и на поддршка на економијата.

Бродњак најави дека целта на банката е постојана дигитализација и овозможување сите рутински банкарски услуги да можат да се извршуваат преку мобилен телефон односно преку таканаречен  „селфсервис“. При тоа укажа на предизвиците со сајбер заканите и укажа дека НЛБ годишно троши повеќе од 10 милиони евра на заштита.

„НЛБ Банка Скопје е во моето срце. Можеби нема да бидеме најголеми, можеби нема да бидеме најпрофитабилни ама сакаме да бидеме оние што најмногу ќе им значат на луѓето. Бидејќи гледавме исти филмови, навиваме за исти екипи и пеевме иста химна“, рече Бродњак.