Акционер во „Адико“ ја промени страната и застана зад НЛБ

Откако „Рајфајзен Банк“ (РБИ) објави дека до 16 јули 2026 година во 12 часот примил изјави за прифаќање на понудата кои се однесуваат на 55,32 отсто од сите акции на „Адико банка“, еден од акционерите веќе следниот ден го промени својот став.

Имено, „Брандес Инвестмент Партнерс“ (БИП) соопшти дека, во актуелните околности, има намера на НЛБ Групацијата да ѝ ги понуди акциите на „Адико банка“ со кои управува во име на своите клиенти.

„Брандес“ е акционер во „Адико“ уште од нејзината иницијална јавна понуда на акции (ИПО) во 2019 година и, како што наведува, внимателно го следел развојот на банката, како и актуелниот процес на нејзино преземање.

„Брандес верува дека понудата на НЛБ претставува најповолен исход за нашите клиенти. НЛБ нуди 37 евра по акција, во споредба со понудата на РБИ од 26,50 евра по акција. Понудата на НЛБ подразбира вкупна вредност на капиталот од приближно 721,5 милиони евра, додека понудата на РБИ го вреднува капиталот на околу 516,8 милиони евра, што е разлика од приближно 204,8 милиони евра“, се наведува во соопштението.

Врз основа на јавно објавените цени, „Брандес“ оценува дека премијата од 39,6 отсто што ја нуди НЛБ носи значително поповолен економски исход за нивните клиенти. Компанијата истакнува дека е свесна оти понудата на НЛБ сè уште е условена со добивање регулаторни одобренија, но смета дека понудената премија доволно ги компензира инвеститорите за дополнителниот ризик од реализацијата на трансакцијата.

Од „Брандес“ порачаа и дека одлуката на НЛБ да го намали минималниот праг за прифаќање на понудата од 75 на 50 отсто отвора поодржлив пат за успешно завршување на преземањето за акционерите кои сакаат да ја максимизираат вредноста на својата инвестиција.

Иако РБИ соопшти дека обезбедил прифаќање на понудата за 55,3 отсто од акциите, со што е надминат минималниот праг од повеќе од 55 отсто, „Брандес“ потсетува дека акционерите кои ја прифатиле понудата на РБИ имаат право да ја повлечат откако НЛБ на 17 јули ја објави подобрената понуда.

 

„Брандес“ изрази и загриженост поради структурата на конкурентската понуда на РБИ, вклучително и договорот за изземање со „Алта Груп“, кој опфаќа четири банкарски подружници надвор од Европската Унија.

„Врз основа на разбирањето на 'Брандес' oд јавно достапните информации, 'Алта Груп' може да задржи ефективен економски интерес во приближно 29,6 отсто од 'Адико банка' преку комбинација на директна сопственост на акции и договори за купување акции. Исто така разбираме дека Австриската комисија за преземања од обемот на акциите релевантни за пазарното тестирање на понудата ги иззема само акциите што 'Алта Груп' ги поседува непосредно“, се наведува во соопштението.

Според оценката на „Брандес“, таквата структура би можела да овозможи реализација на понудата на РБИ и без прифаќање од мнозинството акции што ги поседуваат акционерите кои не се поврзани ниту со РБИ ниту со „Алта Груп“.

Компанијата додаде дека ќе продолжи да го следи понатамошниот развој на настаните и дека конечната одлука ќе ја донесе во согласност со најдобриот интерес на своите клиенти.