Четириесет години „НЛБ банка“: Врвното корисничко искуство ќе биде фокус и во иднина

Секој четврти вработен и секој четврти пензионер во земјава се клиенти на „НЛБ банка“, а според истражувањата, брендот на банката е најпрепознатлив во земјата. Тоа значи дека е стожерна точка во општеството за услугите што ги дава, покажува студијата за социоекономското влијание на „НЛБ банка“ во земјава. Студијата беше публикувана на меѓународната конференција „НЛБ некст“ по повод одбележувањето на 40-годишнината од основањето на банката во земјава.

Според студијата, вкупното кредитно портфолио на банката, заклучно со 2024 година, изнесува 1,4 милијарда евра или 18 отсто од вкупните бруто-кредити во земјата. Според овој параметар, банката е на второ место на пазарот.  

Над 500 милиони евра од кредитното портфолио или 35 отсто се кредити кон компании. Овие податоци покажуваат колку е важна улогата на банката во националната економија, рече академик Абдулменаф Беџети.

„Поддршката на растот на приватниот сектор и развојните проекти на банката се многу важни затоа што на тоа се гледа како на новосоздадена  вредност. Тоа во 2024 година е пресметано на над 4,5 отсто од БДП импакт во економијата и сега, ако се знае каква ни е економијата, мислам дека ова е голем придонес“, рече Беџети.

Академик Абдулменаф Беџети/Блумберг Адрија

Лидер во исполнувањето на ЕСГ-стандардите

Банката заклучно со 2024 година има околу 970 вработени и уште над 23.000 вработени преку синџирот на набавки. А банката што е лидер во исполнувањето на ЕСГ-стандардите води грижа за вработените, рече независниот член на Надзорниот одбор, Зоран Јовановски.

Таа грижа не се покажува само преку платите, кои се повисоки од државниот просек, или повисокиот регрес за годишен одмор и другите бонуси туку најмногу се гледа преку фактот дека лани банката обезбедила по 57 часа дополнителни обуки за секој вработен или вкупно се реализирани 55.000 часа обуки во вредност од 660.000 евра.

Според Јовановски, огромен е придонесот на банката и во делот на заштитата на животната средина.

Независен член на НО, Зоран Јовановски/Блумберг Адрија

„Во 2024 година ‘НЛБ банка’ со над 50 милиони евра поддржала околу илјада проекти за физички и правни лица поврзани со соларни паркови, ветерници, биогасни централи, енергетска ефикасност. Учествувала во финансирање капацитети од обновливи извори со вкупен капацитет од 100 мегавати и овие проекти ќе го намалат јаглеродниот отпечаток за околу 50.000 тони СО2, што е е еквивалентно на емисиите од околу 10.000 автомобили. Не мора да биде вака, но банката одлучила дека сака да оди по тој пат“, рече Јовановски.

Блумберг Адрија

Довербата е најважна

Банката во 2024 година имала актива од 2 милијарди евра или 14 отсто од националниот БДП. Пазарниот удел на НЛБ во банкарскиот сектор изнесува 16 отсто, што ја прави трета најголема банка.

Банката креирала 675 милиони евра додадена вредност, што претставува 4,3 отсто од БДП на Македонија.

„Кај јавноста има впечаток дека банките се многу профитабилни, и добро е што е тоа така. На крајот на краиштата, тоа е еден од најдобрите индикатори за одржување на стабилноста, за растот и развојот и на банката и во целина. Затоа што основаната дефиниција вели дека банката е организација од голема  доверба. А за да стекнете доверба, вие мора да бидете одржливи, да растете, да нудите квалитетни услуги. Така што, од таа гледна точка, да не робуваме на перцепција што се создава од ‘народни економисти’. Банките се профитабилни, но преземаат огромен ризик, прво го ризикуваат својот капитал, а потоа преземаат ризик и со парите од депозитите, со парите на депонентите. И има ли нешто поодговорно од тоа како да се однесувате со тие пари, кои треба да ги алоцирате соодветно, правилно и профитабилно“, вели академик Беџети.

Блумберг Адрија

Растот и иновациите продолжуваат

Растот на банката продолжува и годинава, вели претседателот на УО на банката, Тони Стојановски.

„Денес го славиме минатото, се поклонуваме на тоа што е направено, но силно сме фокусирани и на иднината. Имаме силна амбиција и јасна визија за иднината. Тоа го покажуваат и бројките. За една година активата е зголемена за 20 отсто, што е еднакво на 400 милиони евра. За 32 отсто е зголемено кредитирањето во корпоративниот сектор, за 15 отсто бележиме раст во сегментот население, депозитите се зголемени за 16 отсто и овој раст ќе продолжи и натаму“, рече Стојановски.

Тони Стојановски, претседател на УО на „НЛБ банка“/Блумберг Адрија

Тој најави дека банката ќе продолжи со иновации и дигитализација. Целосно се закружува концептот „digital first“ и до крајот на година сите услуги на банката ќе бидат достапни 24 часа од секоја точка во светот, без да постои потреба од одење во банка.

Продолжува и обновата на мрежата на експозитури, а крајната цел, според Стојановски, не се состои во технологиите што се внесуваат туку во постигнувањето врвно корисничко искуство што „НЛБ банка“ од Скопје сака да го донесе на пазарот и тоа може да го постигне затоа што е дел од силна групација.