БМВ размислува да додаде мотори за да го продолжи опсегот на своите електрични возила

БМВ (BMW AG) ја разгледува можноста за додавање продолжувачи на опсегот на некои од своите возила поради растечката побарувачка за технологијата што ја популаризираат неговите кинески конкуренти, велат луѓе запознаени со стратегијата на компанијата.

Компанијата може да произведува верзии со продолжувачи на опсегот на врвните модели, како што се „X5 SUV“ и седанот „серија 7“ , бидејќи тие се доволно големи за да вклучат мал мотор, велат изворите, барајќи да не бидат идентификувани. БМВ може да стане првиот германски производител на автомобили што ќе ја понуди технологијата што сè уште не е широко достапна во Европа.

БМВ и неговите германски конкуренти се обидуваат да ја оживеат продажбата во Кина откако го изгубија пазарниот удел од локалните производители предводени од БЈД (BYD Co). Продолжувачите на опсегот станаа популарни на најголемиот пазар на автомобили во светот, а веќе се воведуваат и во САД, каде што клиентите претпочитаат големи теренски возила и често одат на долги патувања. Варијантите со долго меѓуоскино растојание на БМВ што се продаваат во САД и во Кина би биле особено погодни за таа технологија, велат изворите.

Автомобилите со продолжување на опсегот доаѓаат со мал бензински мотор, кој не ги движи тркалата како кај конвенционалниот хибрид, туку наместо тоа дејствува како вграден генератор за полнење на батеријата. БМВ веќе произведува некои потребни компоненти, вклучувајќи ефикасни мали мотори, како и менувачи, што би ги намалило трошоците за воведување на таа нова технологија, велат изворите.

„БМВ континуирано ги анализира моделите, потребите на клиентите и развојот на пазарот и го разгледува пазарниот потенцијал на различните технологии“, се наведува во соопштението на компанијата, без попрецизен одговор.

Во Кина продолжувачите на опсегот се сè попопуларни, особено во сегментите на теренските возила, сегмент на пазарот каде што се натпреваруваат Германците. Локалните модели што имаат вградено такви продолжувачи се „јангванг У8“ на БЈД, „M9“ на Алто (Aito) и „Л9“ на „Ли ауто“ (Li Auto). Во Европа продажбата на автомобили е поттикната од силната побарувачка за т.н. плагин-хибриди.

БМВ не е единствената компанија што се занимава со оваа технологија. „Стелантис“ (Stellantis NV) подготвува пикап „рамчарџер“ со проширен опсег за американскиот пазар, додека „скаут“ на „Фолксваген“ (Volkswagen AG) планира во наредните години да понуди робусни теренски возила со проширен опсег. Во ЕУ, „Рено“ (Renault SA) ја вклучува технологијата во своите инвестициски размислувања додека францускиот производител на автомобили го подготвува својот следен бизнис-план, според извршниот директор Франсоа Провост.

„За автомобили од средна до поголема големина нема смисла да се форсираат целосно електрични модели“, рече Провост во едно интервју. „Треба да мислиме за клиентите, а продолжувачите на опсег засега се добро решение.“