Забрзува растот на продажбата на автомобили во Европа, кинеските марки освојуваат пазарен удел

Растот на продажбата на автомобили во Европа забрза минатиот месец, продолжувајќи ја низата зголемувања годинава, додека купувачите се свртуваат кон електричните автомобили, а кинеските производители остваруваат голем дел од зголемувањето.

Регистрациите на нови возила во септември се зголемија за 10 отсто, на 1,36 милиони, соопшти во четвртокот Европската асоцијација на производители на автомобили. Тоа беше осми последователен месечен раст.

Целосно електричните возила и плагин-хибридите учествуваа со 43 отсто во вкупните регистрации, наспроти 32 отсто лани, откако продажбата на автомобили на батерии во Франција и Германија приближно се удвои.

Рекордните цени на горивата, предизвикани од војната на Блискиот Исток, дополнително ја зголемуваат економската исплатливост на електричните автомобили, додека стимулациите во Франција и Германија помагаат да се намалат нивните повисоки продажни цени. Истиот енергетски шок, истовремено, се заканува да ги притисне буџетите на домаќинствата и да ја поткопа довербата на потрошувачите, што потенцијално би ја намалило побарувачката за скапи производи.

Bloomberg

Посилниот пазар им носи извесно олеснување на европските производители на автомобили како „Фолксваген“ (Volkswagen AG). Нивниот профит е под притисок поради слабата побарувачка во Кина, трговските бариери и притисокот за намалување на трошоците на домашниот пазар. Сепак, свртувањето кон електричните возила има и добри и лоши страни.

„Фолксваген“ и неговите конкуренти, меѓу кои „Стелантис“ (Stellantis NV) и БМВ (BMW AG), сè уште заработуваат помалку од електрично возило отколку од споредлив автомобил со мотор со внатрешно согорување, што значи дека оваа промена има своја цена. Истовремено, БЈД (BYD Co.) и „Чери“ (Chery Automobile Co.) ја засилуваат конкуренцијата на домашниот терен на европските производители.

Кинеските марки повеќе од двојно ги зголемија регистрациите од почетокот на годинава, според „Блумберг интелигенс“ (Bloomberg Intelligence), кој очекува тие да остварат голем дел од растот во Европа. Популарниот џеко 7 (Jaecoo 7) на „Чери“ е меѓу моделите што победуваат во изборот на купувачите меѓу кинескиот СУВ и „шкода елрок“ (Skoda Elroq) од групацијата „Фолксваген“.

Bloomberg

Во септември, „Тесла“ (Tesla Inc.) го продолжи закрепнувањето со скок на испораките од 73 отсто. Меѓу кинеските производители на автомобили, „Чери“ предводеше со речиси тројно зголемување, со што речиси го удвои својот пазарен удел во Европа, на 3,9 отсто.

Етаблираните европски производители, кои се соочуваат со тешкотии, добиваат поголема политичка поддршка додека се забрзува укинувањето работни места во индустријата. Претходно месецов, Европската Унија и Кина начелно се согласија за договор со кој ќе се ограничи увозот на хибридни автомобили од Кина во регионот, откако испораките нагло се зголемија.

Франција и Германија постигнаа и договор според кој ќе лобираат кај ЕУ за дополнително ублажување на строгите ограничувања за емисиите на јаглерод диоксид (CO₂) за новите автомобили на фосилни горива што ќе се продаваат од 2035 година. Нивниот заеднички став би можел да му даде поттик и на предложениот пропис „Произведено во Европа“, чија цел е зајакнување на локалното производство.