Крипто рударите сè повеќе јаваат на бранот на ВИ, а го оставаат биткоинот зад себе

Акциите на големите компјутерски компании коишто овозможуваат функционирање на биткоинот повторно ја надминуваат оригиналната криптовалута бидејќи сè повеќе се насочуваат кон хибридни модели изградени околу вештачка интелигенција (ВИ) и високоефектно компјутерство.

Одамна наречени рудари поради перципираните сличности при креирањето на биткоин со рударењето на традиционални стоки како што е златото, компаниите честопати биле на милост и немилост на нестабилните ценовни флуктуации што ги доживува токенот. Пред две години секторот профитираше на почетокот на бумот на вештачката интелигенција, а веќе следната година виде пад на цените на акциите на овие компании бидејќи профитабилноста на рударењето се намали, а конкуренцијата се зголеми.

И покрај масакрот на крипто пазарот во текот на изминатата недела, биткоинот сè уште е во пораст од околу 14 проценти гледано за 2025 година (инаку, рекордот го достигна на почетокот на месецот кога изнесуваше речиси 126.000 долари). Инвеститорите се нафрлија на токенот откако втората администрација на Трамп прифати про-крипто агенда.

Сепак, најголемите победници од овогодинешното враќање на криптото не се сопствениците на биткоин, туку самите рудари. Фондот за следење на фирмите за рударење кои котираат на берзата скокна за повеќе од 150 проценти од почетокот на годината. За разлика од минатите циклуси, кога рударите растеа додека растеше и биткоинот, на компаниите сега се гледа токму како на тоа што стануваат: фирми за технолошка инфраструктура.

Bloomberg Mercury

 

„Инвеститорите во овој момент ги вреднуваат речиси исклучиво рударите на биткоин поради нивните можности за HPC/AI во овој момент“, рече Џон Тодаро, аналитичар во „Нидем“ (Needham & Co). „Би рекле дека помалку од 10 проценти од нашите разговори за рударите се всушност за биткоин и рударење.“

„Сајфер мајнинг“ (Cipher Mining Inc.) и ИРЕН (IREN Ltd.) се пример за овој тренд. Акциите на фирмите кои котираат на Nasdaq оваа година скокнаа за околу 300 и 500 проценти, соодветно, бидејќи се префрлаат од чисто рударење на биткоин кон инфраструктура за вештачка интелигенција. Годинава „Сајфер“ потпиша 10-годишен договор за колокација од околу три милијарди долари со „Флуидстак“ (Fluidstack) - делумно поддржан од „Гугл“ (Google) - кој гарантираше 1,4 милијарди долари обврски за закуп. Договорот е еден од најјасните сигнали досега дека линијата помеѓу крипто-рударењето и ВИ се замаглува.

Во меѓувреме, ИРЕН во средата затвори понуда за конвертибилни обврзници од една милијарда долари. „Тера вулф“ (TeraWulf Inc.), компанија за рударење со седиште во САД, оваа недела исто така објави планови да издаде високо обезбедени обврзници во вредност од 3,2 милијарди долари за финансирање на проширувањето на својот центар за податоци „Лејк маринер“ (Lake Mariner) во Баркер, Њујорк.

„Битдир технолоџис груп“ (Bitdeer Technologies Group), со седиште во Сингапур, во средата порасна за речиси 30 отсто откако објави детали за своите планови за претворање на големите рударски локации во центри за податоци за ВИ, вклучувајќи го и својот објект од 570 мегавати во Кларингтон, Охајо. Компанијата соопшти дека во најдобар случај целосната конверзија до крајот на 2026 година би можела да донесе годишен приход што надминува две милијарди долари.

„За ‘Битдир’, AI/HPC е дополнување на рударството, а не замена“, рече Џеф Лаберж, потпретседател за пазари на капитал и стратегија во „Битдир“. „Ќе продолжиме да бидеме предводници за ефикасност во самостојното рударење и селективно ќе ги конвертираме квалификуваните станици во AI/HPC каде што долгорочните приноси се трајни.“

Bloomberg Mercury

 

Трансформацијата кон ВИ доаѓа по минатогодишното преполовување на вредноста на биткоинот, што ги намали наградите за рударите од 6,25 на 3,125 биткоини. Оттогаш, растечките проблеми на мрежата и забавувањето на обемот на трансакциите ги намалија профитните маржи. Дури и неодамнешните рекордни максимуми на биткоинот понудија мало олеснување за економијата на единиците на рударите.

„Приходите по мегават и ЕБИТДА маржите се далеку повисоки за колокација на HPC и ВИ отколку за рударство“, рече Тодаро од „Нидем“. Со нестабилноста на биткоинот и ризиците од преполовување, додаде тој, „пазарите на капитал ги наградуваат центрите за податоци фокусирани на вештачка интелигенција со многу повисоки мултипликатори од традиционалните рудари“.