Биткоинот се бори да закрепне по историскиот пад

По неделата на остар пад, кој збриша дигитален имот во вредност од стотици милијарди долари, биткоинот повторно не успеа да го оправда статусот на сигурно засолниште.

Криптовалутата, некогаш претставувана како „дигитално злато“ и заштита од пазарни потреси, во петокот наутро по сингапурско време се стабилизира на околу 109.000 долари, според податоците на „Блумберг“ (Bloomberg), по што падна заедно со светските акции и кредитните пазари.

Биткоинот на 6 октомври достигна рекорд од 126.251 долар, но само неколку дена подоцна бран на ликвидации предизвикан од растечките трговски тензии помеѓу САД и Кина доведе до масовна распродажба на поголемиот дел од водечките токени. Пазарот закрепнува бавно, иако водечките компании како „Кракен“ (Kraken), „Сркл“ (Circle), „Битго“ (BitGo) и „Рипл“ (Ripple) сè повеќе влегуваат во регулираните финансиски текови, барајќи банкарски лиценци, платежни мрежи и картични производи.

„Итересно е што падот се случи токму кога големите играчи се обидуваат да добијат банкарски лиценци“, изјави Рејчел Лукас од БТЦ (BTC Markets). Насочувањето кон традиционалната инфраструктура, додаде таа, „претставува стратегија за заштита од волатилноста и обид за зајакнување на кредибилитетот“.

Биткоинот се бори да фати залет по падот Bloomberg

Конфликтите меѓу САД и Кина во трговијата продолжуваат да го оптоваруваат ризичниот имот, вклучувајќи ги и криптовалутите.

Колапсите на компаниите ФБГ (First Brands Group) и „Триколор“ (Tricolor Holdings) повторно ги разбудија стравовите од прикриени кредитни загуби, додека отписите поврзани со измами во ЗБ (Zions Bancorp) и ВА (Western Alliance) збришаа повеќе од 100 милијарди долари пазарна вредност на американските банки за еден ден.

 

Меѓутоа, традиционалните засолништа како златото и среброто бележат нови рекорди, додека биткоинот разочарува. Тој падна за 6,3 отсто во текот на неделата заклучно со 12 октомври, што е најголем пад од март, и сè уште не закрепнал. Истото тоа важи и за повеќето други криптовалути.

„Пред сè, изгледа дека криптопазарот дејствува како канаринец во рудник, навестувајќи нервоза поради растечките кредитни ризици“, изјави Мејтју Хуган, инвестициски директор на „Битвајз“ (Bitwise).

Во наредните денови клучното ниво на поддршка за биткоинот се очекува да биде 107.000 долари. „Пробивање под тоа ниво може да предизвика подлабок пад“, предупреди Лукас.